DILI (timorpost.com) – Daudaun ne’e Programa Nasionál Dezenvolvimentu Suku (PNDS) halo ona levantamentu dadus hodi halo reabilitasaun ba sede suku hamutuk 11 iha munisípiu Dili.
“Ami nia ekipa tun ona iha terenu hodi halo levantamentu dadus kompletu hodi halo reabilitasaun ba sede suku hamutuk 11 husi postu administrativu haat iha munisípiu Dili, no daudaun ne’e sede suku balun halo ona servisu,” diretór PNDS munisípiu Dili, Florenciano Maria Soares, hateten ba Timor Post iha nia servisu fatin Matadouru, Kuarta (17/05).
Diretór ne’e esplika, programa refere implementa iha postu administrativu Kristu Rei mak suku Camea no Kulu-hun, Hera, no postu administrativu Dom Aleixo mak suku Kampu Alor no Bairru Pité, iha postu administrativu Na’in Feto iha suku Bemori, Lahane Oriental, Santa Krús no postu administrativu Vera Krús mak suku Dare, Vila Verde no Kaikoli.
Nia dehan, reabilitasaun sede suku ne’e ho objetivu hodi fasilita servisu suku nian atu halo atendimentu ba komunidade iha suku laran hodi trata dokumentu ruma urjente entaun bele tuur iha laran ho dignu para trata sira nia dokumentu.
Nia informa liután katak, durante ne’e sede suku balun nia edifísiu ho kondisaun aat no ladún favoravel hodi atende ba komunidade sira atu trata dokumentu importante ruma.
Tanba ne’e mak, PNDS implementa programa reabilitasaun ba sede suku sira iha munisípiu hotu hodi fasilita servisu suku nian atu halo atendimentu ba komunidade.
Enkuantu, orsamentu sosa material no selu badaen hodi halo reabilitasaun ba sede suku 11 ho ninia orsamentu rihun 12 USD hodi gasta ba reabilitasaun nian.
984 total views, 3 views today
