DILI, (timorpost.com)— Promblema iha Hospitál Nasionál Guidu Valadares (HNGV) hansan aimoruk no profesionál saude seidauk rezolve, mosu tan plástiku ne’ebé tau raan laiha, mak jurista timoroan, Sérgio Dias Quintas, hatete, kuandu falta ekipamentu médiku ruma no prejudika tebes saúde públiku mak entidade kompetente tenke halo investigasaun.
Jurista timoroan ne’e hatete, HNGV nu’udar hospitál públiku ne’ebé Governu liuhosi Ministériu Saúde tenke fó atensaun katak fasilidade no fornesimentu ekipamentu ba HNGV ne’e tenke iha hodi fasilita servisu médiku iha HNGV.
“Karik ekipamentu médiku ruma falta iha HNGV ne’e prejudika tebes saúde públiku, see kuandu prejudika saúde públiku entaun Inspitór Jerál Estadu (IJE) nian, no bele KAK (Komisaun Anti Korupsaun) no mós bele Provedoria Direitu Humanu no Justisa tenke halo investigasaun, tanba saida mak ekipamentu ne’e la sufisiente para atu atende populasaun ne’ebé mak sai pasiente iha HNGV, ne’ebé ha’u-nia hanoin Inspitor Jerál Estadu mak tenke asume nia papél ho didi’ak para bele halo auditoria, tanba saida mak sasán sira ne’e la kompletu no menus”, dehan, Sérgio Dias Quintas, ba jornalista sira iha nia kna’ar fatin, Tersa, (27/02).
Nia hatutan, entidade kompetente tenke halo invetigasaun hodi detenta keta iha iregularidade ruma entaun tenke foti medida no karik iha indísiu krime ruma tenke kanaliza ba KAK hodi lori ba Ministériu Públiku, ne’e mak tenke halo, kuandu falta auditoria no investigasaun sasán sira ne’e bele la’o laloos, no menus buat hotu.
Iha sorin seluk, Peskizadór Asia Justice and Rights (AJAR), Inocensio de Jesus Xavier, hatete, liga ba plástiku tau raan iha HNGV laiha ne’e problema ida tanba maske, osan tau ona kompaña Salimagu mós promete ba promete, situasaun iha HNGV ne’e nafatin hasoru krize, liuliu plástiku ne’ebé atu tau raan, banhira atu halo doasaun raan.
Nia hatutan, ne’e mós fó ameasa ba pasiente sira ne’ebé hakarak hetan raan ruma, ka ema ruma hakarak fó apoiu raan mós plástiku laiha, plástiku ne’ebé presiza duni atu garante kualidade raan banhira tau-raan ba ema seluk.
“Ita la hatene Primeiru Ministru bele husu to’ok ba Ministra Elia (Ministra Saúde) nia servisu loloos mak saida, inklui señor José Magno, vise-ministru ida-ne’e no mós señor Flavio, ministru tolu ne’ebé mak hulan lesuk instituisaun Ministériu Saúde, mais saúde agora hakdasak hela de’it hanesan ne’e ha’u la hatene, tanba ne’e presiza hadi’a”, Inocensio hatete.
Informasaun sira husi públiku ne’e nu’udar importante loos atu hadi’a kualidade saúde iha ospitál no mós iha munisípiu sira.(*)
2,742 total views, 3 views today
Bele hare Video Seluk :
Subscribe to Timorpost
