DILI, (timorpost.com) — Sekretáriu Estadu Komunikasaun Sosiál (SEKOMS), Expidito Dias Ximenes, asina kontratu ho Jestór Rádiu Komunidade (RK) hamutuk 17 iha Palásiu Governu. Husi asinatura ne’e SEKOMS apoiu Rádiu Komunidade sira ho orsamentu hamutuk rihun $101 USD.
“Ita hotu hatene iha progarama IX Governu Konstituisianál nia iha tinan lima, iha área komunikasaun sosiál, rádiu komunidade mós sai prioridade”, Sekretáriu Estadu Komunikasaun Sosiál (SEKOMS), Expidito Dias Ximenes, hato’o asuntu ne’e ba jornalista sira iha Palásiu Governu, Sesta (24/11), hafoin asina kontratu ho Jestór Rádiu Komunidade sira.
Nia hatutan, depois halo vizita ba rádiu komunidade balun iha Leste no Oeste, rezumu ne’ebé hetan katak rádio komunidade sira, presiza fortifika no fó atensaun, tamba rádiu komunidade balun laiha kondisaun ne’ebé di’ak, atu bele hala’o sira-nia kna’ar hanesan rádiu komunidade iha komunidade nia leet.
“Ohin IX Governu Konstituisionál liuhosi orsamentu ne’ebé tau iha SEKOMS, fó apoiu liuhosi akordu ne’ebé ohin asina ho jestor sira rádiu komunidade 17, ho momtante ne’ebé la hanesan. Totál orsamentu ne’ebé SEKOMS transfere ba iha rádiu komunidade 17 hamutuk sentu i um mil dollares (rihun $101 USD) ba sira atu bele fortifika sira-nia servisu, hanesan informadór liña frente informasaun iha komunidade nia leet, hanesan balun presiza transporte, presiza leptop, komputadór no balun presiza hadi’a estudiu ki’ik-oan ne’ebé iha rádiu komunidade”, nia esplika.
Apoiu ne’ebé Governu fó atu rádiu komunidade sira bele fortifika sira-nia servisu liuliu kobertura ho sira-nia produzaun iha rádiu komunidade.
“Ha’u hanoin Governu Ida-ne’e ho polítika ne’ebé fó atensaun tebes ba dezenvolvimentu informasaun iha públiku, liuliu oinsá bele fó atensaun ba moris komunidade nia, atu informa saida mak asaun governativa iha IX Governu nia mak ida liña frente informasaun besik liu komunidade mak rádiu komunidade sira”, Expedito Dias Ximenes, informa.
Polítika Governu nian mak atu fortifika rádiu komunidade sira-nia servisu iha komunidade nia leet, enkuantu orsamentu ne’ebé aloka ba rádiu komunidade 17 ne’e ho montante la hanesan, no aloka tuir nesesidade ne’ebé rádiu komunidade sira iha.
Orsamentu ne’ebé SEKOMS aloka ba RK-17 ne’e tuir nesesidade ne’ebé antes ne’e tékniku sira identifika ona, liuliu ba ekipamentu no transporte hodi fasilita servisu jornalista iha rádiu komunidade sira. Espera katak ho apoiu ne’e sei rezolve problema ne’ebé rádiu komunidade sia infrenta. (*)
1,194 total views, 3 views today
Bele hare Video Seluk :
Subscribe to Timorpost
