MANATUTO, (timorpost.com)– Ministru Petróliu Rekursu Minarai (MPRM), Francisco da Costa Monteiro, informa rai Natarbora iha munisípu Manatuto Governu no Estadu hili ona sai hanesan fatin sentru integradu ba dezenvolvimentu indústria petróliu iha rai-laran.
Nia dehan, iha tinan hirak liubá Governu ba ona iha Natarbora hodi haree rai iha Natarbora, ne’ebé dezignadu tiha ona ka hanoin ona atu bele sai hanesan alternativu ba harii fábrika planta LNG ida iha Natarbora, atu investe iha Beasu, tanba ne’e, ekipa MPRM mai fali, atu hatutan hanoin balun no servisu balun ne’ebé uluk planeia ona iha rai Natarbora.
“Ha’u hakara informa fali katak, rai Natarbora ne’e ita-nia Governu no Estadu hili ona sai hanesan fatin ne’ebé atu sai sentru integradu ba dezenvolvimentu indústria petróliu iha rai-laran katak sei iha fábrika produsaun petróliu nian hodi halo refinaria”, Ministru MPRM, Francisco da Costa Monteiro, informa iha ámbintu sosializasaun projetu tasi-mane iha salaun Parókia Natarbora, Tersa, (13/02).
Governante ne’e informa, dezenvolvimentu Kosta Súl kompostu husi sentru tolu mak, Suai Supply Base, Betanu Tefinaria Petrokímika iha Betanu no parte Leste mak dezenvolvimentu kadoras ka planta LNG iha Beasu.
“Iha tinan lima liubá ita núnka rona dehan atu iha sentru desenvolvimentu intergardu ba patróliu ida iha Natarbora maibé Governu da-IX, liuhosi Primeiru Ministru haree situasaun no kondisaun ekonomia no haree ita-nia realidade katak rai iha Natarbora ne’e kuaze liu 300 hektres, ho ida-nee Governu iha hanoin atu ajusta no konfirma katak investe ne’ebé atu tau iha Beasu no Betanu ne’e la presiza tau keta-ketak tanba ita tau keta-ketak ne’e sei gastu osan barak liu, tanba ne’e Governu iha hanoin ida ho tau projeitu refinaria no patrokímika iha Natarbora de’it”, dehan nia.
Governante ne’e haktuir, populasaun munisípiu Manatuto antes ne’e informa ona ba Primeiru Ministru katak see Governu deside lori fábrika no planta ba Natarbora, entaun Natarbora preparadu hodi kolabora sein defikuldade bar-barak.
Tanba ne’e Ministru MPRM husu ba komunidade Natarbora tenke kolabora no koopera bainhira Governu lori projetu ba área Natarbora nian.
Iha fatin hanesan, Presidente Autoridade Munisípu Manatuto, Luis Inasio Fernandes, hatete, lori komunidade Manatuto sente ksolok tebes rona projetu Tasi-Mane sai projetu estratéjiku.
“Daudauk ne’e ita hotu hatene projeitu Bayu Undan hahú atu dezmantela daudauk ona, ita hotu hatene katak fundu finasiamentu Estadu ida-ne’e, ita dependente liu ba fundu Minarai, ita-nia despreza boot liu ba sustenta Estadu ne’e, mai husi fundu minarai, fundu sira seluk iha duni, maibé labele kobre despesa Estadu nian”, nia hatete.
Tanba ne’e, hanesan autoridade agradese tebes tanba projeitu ne’e estratéjiku, tanba ne’e rona hamutuk ne’e la’os konsultasaun maibé sosializasaun atu implimentasaun projeitu refere.
“Konsekuénsia husi projeitu ne’e iha vantajen no dezvantajen, mais ita sura mak vantajen ba sosiu-ekonómiku, iha problema uitoan kuandu ema barak mai ona ita rai, espera katak buat hotu sei la’o ho di’ak”, nia subliña.
Tanba ne’e, husu ba lia-na’in no entidade hotu-hotu ne’ebé pretense ba projeitu ne’e labele halo intensaun atu halo impendimentu.
Partisipa iha serimónia sosializasaun ne’e, Presidente Autoridade Munisípu Manatuto, Presidente Timor GAP, Diretór Jerál MPRM, Kordenadór Task Force Timor GAP, Komandante PNTL munisípiu Manatuto, Presidente Konsellu Veteranu Manatuto no partisipa mós husi autoridade lokál no komunidade Manatuto.(*)
2,439 total views, 6 views today
Bele hare Video Seluk :
Subscribe to Timorpost
