KOVALIMA, (timorpost.com)– Ministru Petróliu Rekursu Minerai ( MPRM), Francisco da Costa Monteiro, sosializa projetu Suai Supply Base ba komunidade afeitadu suku 4 iha Suai, munisípiu Kovalima.
Liuhosi sosializasaun ne’e MPRM atu rona komunidade liuliu komunidade afeitadu sira-nia hanoin projetu refere.
Ministru Petróliu Rekursu Minerai (MPRM), Francisco da Costa Monteiro, hatete, atividade sosializasaun ba programa Governu kona-ba dezenvolvimentu Kosta Súl, liuliu iha munisípiu Kovalima tanba Kovalima ne’e projeitu lubuk ida mak Governu da-IX tau hanesan perioridade, define mós iha planu, programa no polítika iha MPRM.
Nia hatete, MPRM halo sosializasaun tanba Priméiru Ministru, Kay Rala Xanana Gusmão, ko’alia barak ona kona-ba projetu sira ne’e, tanba Governu da-IX fó importánsia tebes ba dezenvolvimentu ekonomia.
“Ho orientasaun Priméiru Ministru nian rasik, ami hanesan Ministru ne’ebé relavante iha área dezenvolvimentu ekonómiku hetan fiar no mós orientasaun katak, tenke halo lalais ka aselera lalais atividade no programa ne’ebé bele dudu atividade ekonómiku iha ita-nia rai, iha ita-nia munisípu sira, tanba ne’e ami mai ho objetivu ida-ne’e duni atu sosializa servisu no programa mak MPRM trasa ona ba tinan lima oin mai iha governasaun da-IX, liuliu tinan 2024”, dehan Ministru MPRM, Francisco da Costa Monteiro, iha ámbintu sosializasaun iha salaun administrasaun Kovalima, Kinta, (08/02).
Governanate ne’e hatete, polítika Governu nia hakarak kontinua hala’o dezenvolvimentu ba projeitu tasi-mane ne’ebé paradu tiha.
“Projeitu ne’ebé boot tebes liu mak supply base, parte ida importa tebes iha ita-nia planu ho vizaun dezenvolvimentu ita-nia setor Petroliu hanesan, halo indutrilizasaun setór petróliu nian, entaun komponente ida Suai Supply Base ne’e importante tebes”, nia dehan.
Liga ba projeitu Suai Supply Base mosu duni preokupasaun tanba projeitu ne’e hahú uluk kedas, maun boot nia tempu kedas maibé paradu tiha uitoan iha Governu sira tui-tuir mai, entaun laiha kontinuidade konsentra dezenvolvimentu, tanba ne’e Governu ida-ne’e fó konfiasa fila-fali ba komunidade iha Kovalima para kontinua dudu projeitu ne’e ba oin.
“Aréa ne’ebé mak afetadu ne’e rai hektares 1.113 liu, ne’e kobre suku 4 hanesn, Kamanasa, Belekasa, Marai no suku Holbelis, dadus iha hotu ona identifikasaun halo hotu iha tempu ne’eba, agora ita fó kontinuasaun ba prosesu ne’e”, nia esklarese.
Iha fatin hanesan, reprezentante komunidade, Jacinto Goveia Leite, hatene, banhira atu halo dezenvolvimentu ba iha tasi-mane tenke iha planu oinsá atu muda komunidade nia moris.
“Ita labele promete depois ikus mai la realiza, tanba foin lalais parte, Timor Gap promete, maibé la realiza, ida-ne’e ami la aseita”, nia afirma.
Sosializasaun ne’e durante loron ida, deskuti kona-ba esbosu lei Projetu Suai Supply Base nian.
Atividade ne’e hetan mós partisipasaun husi parte Timor Gap, Sekretáriu Munisípiu Kovalima, Konsellu Veteranu munisípiu Kovalima, PNTL, autoridade lokál no komunidade iha Suai.(*)
3,135 total views, 3 views today
Bele hare Video Seluk :
Subscribe to Timorpost
