DILI (timorpost.com) – Ministériu Interior (MI), ofisialmente simu ona relatóriu re-fiskalizasaun ranting Arte Marsias (AM), hosi Ministériu Juventude Desportu no Kultura (MJDK), ne’ebé akompaña hosi Polísia Nasionál Timor-Leste (PNTL) no KRAM, hafoin simu relatóriu ne’e, halo diskusaun molok entrega ba Primeiru Ministru (PM), Kay Rala Xanana Gusmão.
Ministru Juventude Desportu no Kultura, Nelio Isac, hatete, Governu entrega ona relatóriu ne’ebé Komisaun Reguladora Artes Marsiais (KRAM), halo iha tinan kotuk, bainhira kuandu Oitavu Governu hasai rezolusaun suspende atividade arte marsias. Bainhira rezolusaun ne’e sai fó mandatu espesiál ida ba iha MI no MJDK, atu haree halo fiskalizasaun monitorizasaun hodi hatene didi’ak kona-ba lala’ok atividade arte marsias nian.
Tanba ne’e mak durante tempu hirak nia laran, Komisaun Reguladora Artes Marsiais, halo re-fiskalizasaun ba to’o iha sentru treinamentu arte marsias iha territóriu nasionál hodi hatene kona-ba problema arte marsias nian.
“Ho nune’e mak ami mai hato’o relatóriu re-fiskalizasaun ranting arte marsias ne’ebé mak durante tempu naruk KRAM halo iha territóriu nasionál, entaun iha ne’e Ministru Interior ho ami haree hamutuk haree asuntu ne’e halo analiza klean liután hodi bele hato’o ba Primeiru Ministru, kona-ba problema arte marsias nian iha tempu sira tuir mai,” Nelio Isac hato’o informasaun ne‘e hafoin remata enkontru ho Ministru Interior iha salaun MI Kaikoli, Kinta (08/02).
Nia dehan, diskusaun ne’e parte hirak halo kleur uitoan, tanba iha asuntu balun mak presija diskute hodi hatene kona-ba rekomendasaun lubuk ne’ebé mai hosi KRAM.
“Rekomendasaun hosi KRAM ne’e ha’u seidauk detallu por detailu atu hateten sai ba ita boot media sira, tanba presija analiza di’ak liután kona-ba rekomendasaun ne’ebé iha, klaru katak rekomendasaun hirak ne‘e la halai sees hosi atividade grupu arte marsias nian, liuliu kona-ba individu katak ema hirak ne‘ebé envolve arte marsias, haree kona-ba organizasaun to’o iha sentru treinamentu,” nia hateten.
Tanba ne’e, MJDK seidauk bele fó informasaun detallu, maibé públiku sei hatene bainhira to’o faze tuir mai governu sei esplika, tanba sá mak governu halo desizaun hanesan ne’e no hanesan ne’ebá, tamba ne’e la’ós tuur hanoin foti desizaun.
“Atu reativa atividade arte marsias, ha’u seidauk bele hatene depende ba organizasaun arte marsias sira nian rasik, bainhira kuandu iha prosesu halo di’ak sira nia atitude sira ne’e di’ak hotu, hanoin katak governu sei la bandu asosiasaun atu harii iha nasaun ne’e, tanba ne’e depende ba sira nia karakter organizasaun no mós sira nia atitude no individu sira ne’ebé sai membru iha organizasaun atu trata sira nia programa ba iha asuntu ne’e,” nia subliña.
Entretantu, Ministru Interior, Francisco Guterres, reforsa katak, enkontru ne’e MJDK, KRAM no PNTL hamutuk hodi halo diskusaun ida kle’an liután, tanba atu hamosu rezolusaun suspende atividade arte marsias, iha ne’ebá temi katak ministériu rua mak sei konta halo monitorizasaun, supervizaun kona-ba atividade hotu.
“Tanba ne’e mak Ministru MJDK ho Ministru Interior ami hasai despaixu konjuta ida hodi nune’e PNTL no KRAM atu bele ba hamutuk halo re-fiskalizasaun ba iha sentru treinamentu arte marsias sira nian, atu nune’e bele hatene loloos sira ne’e priénxe kritériu no la’o tuir duni buat ne’ebé iha ona ka lae, hosi re-fiskalizasaun ranting arte marsias ne’e mak KRAM lori nia rezultadu mai aprezenta ba iha Ministru Interior,” nia hatutan.
“Relatóriu refere, depois Ministériu rua ami sei haree hodi hato’o ba Konsellu Ministru, saida los mak ita presiza atu tau iha ne’ebá hodi bele diskute no haree tok halo formula, arte marsias ninia kontribuisaun ba estadu ne’e saida, katak ita bele halo buat hotu, maibé ita kontribui ba dezenvolvimentu pas no seguransa ne’e mak importante,” Governante ne’e hato’o.
Tanba ne’e, Ministériu Interior seidauk bele adianta buat ruma, tanba relatóriu ne’e foin mak simu no haree hela no presiza diskute halo kle’an.
Entretantu, partisipa iha diskusaun ne’e, marka prezensa hosi reprezentante Ministériu Defeza, KRAM, PNTL, MJDK no MI.
4,386 total views, 3 views today
Bele hare Video Seluk :
Subscribe to Timorpost
