Manufahi(timorpost)—EkipaFiskalizadorbaprogramamerendaeskoláraprezenta rezultadu peskiza katak Ekipa Jestaun Programa Merenda Eskolár (EJPME) ba eskola sira iha Munisípiu Manufahi la tuir menu hahán.
Xefe Departamentu Informasaun no Promosaun Seguransa alimentár Munisípiu Manufahi, hanesan responsavel ba fiskalizasaun, Lucinda Fernandes Baptista aprezenta katak, ekipa deteta iha eskola lubun ida maka kontra regra programa merenda eskolár.
“Ita deteta jestór sira aplika te’in hahán ba alunu sira la tuir menu programa merenda eskolár ne’ebé iha”, dehan Lusinda iha nia aprezentasaun ba rezultadu peskiza ne’ebé hala’o iha Salaun Administrasaun Munisípiu Manufahi, Tersa (21/11).
Tuir Lusinda, eskola lubun ida fó han naan ayam buras, la tau ai-fuan. Oráriu han naan, implementador sira fó fali tahu ba alunu sira no la tau manu-tolun no modo tahan. Iha eskola balun han tahu nune’e manu tolun ida fahe ba alunu na’in 2. Iha eskola balun hahán balun soe, fó de’it ba fahi.
Fatin hanesan, Administradór Munisípiu Manufahi (AMM), Arantes Isaac Sarmento argumenta katak, orsamentu ba programa merenda eskolár mai Manufahi hamutuk 1,000,000.00 USD (millaun ida) ba tinan ida.
“Orsamentu ne’e boot ho intensaun atu hadi’a nutrisaun ba alunu sira no promove produtu lokál atu hadi’a ekonomia komunidade agrikultór”, nia esplika
Nune’e nia husi atu implementa tuir menu ne’ebé mak deside ona. Labele fó fali ayam potong, biscuit no produtu sira ne’ebé fa’an iha loza ba alunu sira.
“Tenke te’in produtu lokál, tanba ai-han lokál riku ho nutrisaun”, nia fó hanoin.
Maibé rezultadu peskiza hosi ekipa fiskalizasaun hetan falansu, nia husu atu hadi’a atu nune’e hodi la’o tuir duni regra programa merenda eskolár nian hodi bele fó benefísiu ba alunu sira nune’e mós benefísiu ba agrikultór.
Iha okaziaun ne’e Diretór Edukasaun Munisípiu Manufahi, Trinito Sarmento hatete, iha ekipa jestór hamutuk grupu 16 ne’ebé implementa programa merenda eskola iha munisípiu Manufahi.
Aprezentasaun rezultadu peskiza ne’e partisipa mós grupu 16 ne’ebé implementa programa merenda eskolár. Iha loron primeiru hala’o avaliasaun hodi hadi’a fallansu ne’ebé mosu durante implementasaun.
Loron tuir mai sei fó formasaun ba EJPME kona-ba oinsá atu halo relatóriu ba implementasaun programa ne’e. EJPME ne’e grupu 12 ba Eskola Públiku, no grupu 4 ba Eskola Katólika.(#)
1,449 total views, 3 views today
Bele hare Video Seluk :
Subscribe to Timorpost
