Dili(timorpost.com)—Portavoz Asosiasaun Futeból (16), Hipólito Soares, hateten daudaun ne’e sira kontinua hein rezultadu sira nia proposta ne’ebé mak hatama ona iha Federasaun Futeból Timor-Leste (FFTL), hodi realiza Kongresu Estraordináriu.
Nia subliña, tanba Federasaun tenke ko’alia ka halo ona koordenasaun ho FIFA nune’e bele fó ona responde ruma kona-ba sira nia proposta ne’e, tanba tempu agora ne’e kontinua la’o nafatin.
Tuir nia, tanba proposta ne’ebé mak sira hatama ba Federasaun Futeból Timor-Leste (FFTL), iha kongresu Annual, atu husu halo kongresu estraordináriu atu troka estrutura ne’e iha semana kotuk liubá.
“Ami nia proposta ne’ebé hatama tiha ona dezde semana kotuk, entaun ami kontinua hein tanba, ami maioria deside atu realiza Kongresu Estraordináriu hodi troka estrutura atuál FFTL agora”, nia hateten, iha Kampu Alor, Domingu (09/07).
Tanba, Asosiasaun nia proposta tama ona husu atu halo kongresu estraordináriu signifika estrutura agora ne’e la vale ona no sira labele halo la’o atividade ruma, kuandu halo tiha lai kongresu estraordináriu.
“Ida ne’e mak ami husu sira tenke halo ona koordenasaun lalais kona-ba ami nia proposta ne’e ho FIFA, nune’e iha tempu badak ne’e bele realiza hodi hili estrutura foun atu bele realiza atividade futeból iha rai laran”, nia deklara.
Maibé kuandu sira mak dada nafatin no la halo kongresu estraordináriu iha tempu badak nia laran entaun atividade mós sei mout nafatin, tanba asosiasaun sira la konsidera ona estrutura sira agora ne’e mak halo proposta hodi realiza Kongresu Estraordináriu ne’e.
Atu hakotu nia subliña, sira nia proposta foin daudaun hatama ba Federasaun Futeból Timor-Leste (FFTL), ne’e atu realiza Kongresu Estraordináriu iha loron 01 fulan Setembru tinan ida ne’e.
1,938 total views, 6 views today
Bele hare Video Seluk :