Timor Post (11/03/2021)—Eis Primeiru Ministru Marí Bim Amude Alkatiri hatete, serka sanitária no konfinamentu obrigatóriu iha Munisípiu Dili, harii situasaun ida ne’ebé bele ajuda servisu saúde, seguransa no defeza bele kontrola di’ak liu surtu COVID-19, maibé labele husik merkadu mamuk.
Tanba ne’e, Alkatiri apela atu governu buka solusaun. Tuir nia, importante tebes loke dalan balu (corredores) ho kontrole sanitáriu maka’as atu produtu primária nesesidade, produtu lokal no produtu importadu husi rai seluk inklui mós aimoruk.
“Produtor lokal modo tahan no produtu agrikultura nian oi-oin, kafé, mina nú, etc. agora dodok hela iha fatin ka travadu hela iha fatin tanba labele tama mai Dili tanba serka sanitária. Dili hahu mamuk ho produtu lokal ne’ebé uma hotu-hotu sempre uza ba sira nia nutrisaun,” Alkatiri konfirma nia públikasaun ne’e ba Timor Post via Whatsapp, Kuarta (10/03/2021).
“Nune’e ha’u apela ba governu atu fo atensaun ba situasaun no buka solusaun atu loke ho medida kontrole maka’as atu produtores lokais sira bele hatama sira nia produtu mai merkadu iha Dili,”eis Primeiru MInistru atual Sekretáriu Jerál FRETILIN ne’e subliña.
Entretantu Governu lideradu Primeiru Ministru Taur Matan Ruak liuhusi reuniaun konsellu ministru deside taka atividade komérsiu ne’ebé la’ós kategosia nesesidade imediata. Desizaun ne’e foti ona maibé Ministériu Koordenador Assuntu Ekonomia ho Ministru Turizmu Komérsiu no Indústria mak sei fó sai tipu atividade komérsiu saida mak kategoriza hanesan nesesidades imediata.
Governu liuhusi reuniaun Konsellu Ministru foti ona desizaun hodi implementa medida serka sanitaria no konfinamentu obrigatóriu iha sidade Dili duran loron-hitu hahú husi loron Tersa (09/03/2021) to’o loron Segunda (15/03/2021).
Hafoin reuniaun Konsellu Ministru, Ministru Prezidénsia Konsellu Ministru (MPKL) Fidelis Leite Magalhães haktuir, desizaun ne’e governu foti tanba transmisaun lokal moras daet COVID-19 iha Dili laran.
Fidelis dehan, tanba tuir regra serka sanitaria durasaun ba loron hitu maka depois de prazu ida ne’e maka governu sei halo fali desizaun bazeia ba dezenvolvimentu situasaun atuál iha rai laran liuliu iha munisípiu Dili.
Durante serka sanitaria, Fidelis subliña, bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk, aihan no seguransa.
“Maibé só iha autorizasaun husi ministériu interior no husi Sentru Integradu Jestaun Krize (SIJK),” Fidelis hatete.
Nia hatutan, ba sira ne’ebé husi munisípiu seluk no rejidente iha Dili, sira bele tama mai Dili maibé tenke relata ba SIJK no kumpri konfinamentu obrigatóriu.
Konsellu Ministru mós deside atu labele halo atividade kulturais, reliziosa no atividade sira ne’ebé halibur ema barak durante periodu serka sanitaria iha Dili.
Fidelis dehan, konsellu ministru mós bandu atu komunidade sira sai husi um aba fatin públiku sira bainhira laiha nesesidade.
“A não ser nesesidade urjente sira hanesan ba hola aihan ou hola eletrisidade ou hola medikamentu sira, maibé la’o iha númeru kiik no bainhira pesoal seguransa sira halo para karik tenke justifika,” Fidelis salienta. (cao)
606 total views, 3 views today
Oinsa Ita nia Reaksaun iha Notisia Nee?
You have reacted on “Eis Primeiru Ministru Apela ba Governu Buka Sol…”
Bele hare Video Seluk :
Subscribe to Timorpost1
/
2194
FAMILIA SIMU TIMOROAN DEPORTADU HO MATAN BEEN
PREPARASAUN BA VIZITA SUA SANTIDADE ATINJE ONA 80%
FRETILIN HUSU GOVERNU KONSIDERA VITIMA EVIKSAUN SIRA NIA HALERIK
1
/
2194
