Dili(timorpost.com)—Xefe suku Bairru-Pité, João Batista da Costa Belo, hatete sira sei preokupa hela ba kondisaun estrada ne’ebé mak aat liu-liu iha area Perumnas no Ailok-Laran ninian.
“Estrada Perumnas no Ailok-Laran ne’e hosi parte governu nian delega ona kompañia sira mai haree tiha ona, maibé to’o sira seidauk mai hadi’a estrada ne’e, tanba ne’e mak estrada sei kontinua aat hela ne’e”, João Batista, hatete ba jornalista Timor Post iha Sede Suku Bairru Pité, Tersa (25/04/2023).
Xefe suku dehan, iha parte hudi-laran nian mós estrada ladún di’ak, komunidade sira hela iha ne’ebá sente triste, tanba kondisaun estrada ladún di’ak, husi parte governu liuhosi programa Planu Nasionál Dezenvolvimentu Suku (PNDS) postu nian komesa sukat ona.
Parte Ailok-Laran nian ne’e governu mak haree ba estrada refere, maibé agora daudauk hosi parte governu nian sei iha preokupasaun hela.
“Ha’u garantia katak, to’o eleisaun ne’e hotu hosi parte governu nian tenke mai halo ona estrada refere”, nia dehan.
Tanba ne’e nia husu ba governu bele aselera ka hadi’a estrada Diresaun Bairru-Pité halai ba Ailok-Laran, tanba estrada ne’ebá públiku, tanba Rádiu Timor Kmanek (RTK) mós iha leten atu nune’e komunidade sira halai transporte karik labele falla.
Maski munisípiu Dili hanesan kapitál nasaun nian, maibé estrada públiku balu kontinua aat, durante ne’e públiku kestiona bá dezenvolvimentu liu-liu ba iha area Ailok-Laran nian.
1,792 total views, 15 views today
Bele hare Video Seluk :