DILI (timorpost.com)—Eis Prezidente Liga Futeból Timor-Leste (LFTL), Nilton Gusmão, prontu lidera Federasaun Futeból Timor-Leste (FFTL) bainhira hetan apoiu husi asosiasaun futeból sira iha Timor-Leste.
“Asosiasaun sira apoiu ha’u, inklui asosiasaun futeból Dili Leste ohin prefere ha’u atu hakat ba kargu Prezidente FFTL, ne’ebé sim ha’u prontu asume”, Eis Prezidente Liga Futeból Timor-Leste (LFTL), Nilton Gusmão, informa ba jornalista Timor Post, bainhira partisipa iha asembleia jerál anuál CCI-TL, iha salaun Delta Nova, Sesta (17/11/2023).
Na’in ba kompañia Esperansa Timor Oan (ETO) ne’e hein de’it bainhira iha ona desizaun ruma husi asosiasaun futeból munisípiu no asosiasaun seluk no konfirmadu ona mak eis Prezidente LFTL ne’e prontu kandidata-an hodi lidera FFTL.
Iha parte seluk Prezidente Asosiasaun Futeból Dili Leste, Aleixo Cobra, husu figura Nilton Gusmão, ho Francisco Kalbuadi Lay, rua ne’e tenke iha konsensus, para hakat ba asume kargu nu’udar Prezidente FFTL, komunikasaun di’ak para sériu hodi dezenvolve futeból iha Timor-Leste.
“Ha’u hatete sira na’in rua di’ak hotu, Nilton mós ema di’ak, Francisco mós ema di’ak, agora sira rua maka ko’alia ba malu, halo konsensus, ida ne’ebé maka ba oin”, Prezidente Asosiasaun Dili Leste, Aleixo Cobra, rekomenda bainhira dada lia ho Timor Post.
Aleixo Cobra sente kontente tanba konsege hasai ona ema balun ne’ebé ladún iha hanoin atu dezenvolve bola ka’er fali estrutura FFTL, nune’e agora Asosiasaun Dili Leste hanoin hikas figura rua entre Nilton ho Francisco Kalbuadi mak sei asume fali kargu para lori futeból sai ba di’ak, maibé figura rua ne’e tenke ko’alia ba malu para kandidatu ne’e ema ida.
“Agora Nilton ita presiza tanba bele dezenvolve futeból ho ninia pensamentu, ideia ba bola ne’e di’ak, maibé ninia problema ne’e sira na’in rua labele la’o ketak-ketak, tenke la’o hamutuk”, Aleixo Cobra esplika.
Timor Post akompaña deklrasaun sira husi asosiasaun futeból munisipiu sira nota katak, daudauk ne’e asosiasaun 13 maka halo deklarasaun atu fó apoiu ba figura Nilton Gusmão, atu hakat ba kargu Prezidente FFTL para dezenvolve futeból iha rai-laran.
Antes ne’e, Francisco Jeronimo, rejigana-an ona husi nia kargu nu’udar Prezidente FFTL tanba ezijénsia husi asosiasaun futeból sira hodi fó fatin ba lideransa seluk hodi lidera FFTL ba oin.(*)
624 total views, 6 views today
Bele hare Video Seluk :
Subscribe to Timorpost
