Dili(timorpost.com)— Ministru Juventude Desportu no Arte Kultura, Nélio Izaac Sarmento, promete durante nia mandatu tinan lima, sei hadi’a dezenvolve Desportu hotu liu-liu futeból no halo infraestrutura.
Deklarasaun ne’e nia dehan ba Jornalista sira, hafoin halo serimónia hand over ho Sekretáriu Estadu Juventude no Desportu (SEJD), inklui hanesan loron dahuluk ba nia servisu hanesan Ministru Juventude Desportu no Arte Kultura, iha Lecidere, Segunda (03/07).
“Uluk ha’u iha ne’e hanesan Sekretáriu Estadu maibé tinan rua de’it, agora ha’u fila fali mai maibé ho Ministru Juventude Desportu no Arte Kultura fali, entaun signifika ita nia instituisaun ne’e sa’e ba Ministériu, tanba ne’e durante ha’u nia nia mandatu tinan lima, sei hadi’a dezenvolve Desportu hotu liu-liu futeból no halo infraestrutura”,
Nia hatete, ministru ne’e nia responsabilidade mós sei boot liután, liu-liu populasaun Timor ne’e maioria joven.
“Agora daudaun ne’e ha’u nia parte seidauk bele avansa ho hanoin balun, tanba governu ida ne’e sei mai ho nia planu estratéjiku ba programa Juventude Desportu no Arte Kultura”, nia subliña.
Nia subliña, entaun iha tempu badak nia laran ne’e sei buka hatene problema internal iha Ministériu ida ne’e nia laran iha diresaun sita hotu nune’e bele solusiona ho profisionál nune’e bele masimiza instituisaun ida ne’e ninia funsionamentu.
“Ba programa Juventude Desportu no Arte Kultura, liu-liu ba desportu ne’e espesifika uitoan hosi aselera, tanba ita iha difikuldade no problema iha area Desportu, tanba menus atividade hodi atleta no Jogadór sira atu partisipa”, Nélio hateten.
Eis Sekretáriu Jerál Federasaun Futeból Timor-Leste subliña, entaun nia garantia no prontu ona atu rezolve no solusiona problema sira ne’e hotu durante nia mandatu tinan lima iha Nonu Governu ida ne’e.
“Entaun ha’u ho Nonu Governu ne’e iha kometimentu ona atu halo infraestrutura no kria atividade la’ós de’it ba Futeból, maibé ba modalidade Desportiva hotu-hotu, entaun ida ne’e la’ós ko’alia de’it, maibé tenke iha planu no iha programa di’ak ba ida ne’e”, Nia hateten.
Tuir nia hanoin katak, ohin nia foin tama fali iha instituisaun ida ne’ebá, entaun sei identifika problema sira ne’e, nune’e molok tinan ida ne’e remata iha ona mudansa profisionalizmu ba area sira ne’e, nune’e bele halo ona infraestrutura no kria atividade.
1,821 total views, 3 views today
Bele hare Video Seluk :
Subscribe to Timorpost
