Dili-Ministériu Saúde (MS) propoin orsamentu millaun US$47.5 iha Orsamentu Jeral Estadu (OJE) 2020 nian, ne’ebé sei aloka ba iha salariu vensimentu, bem servisu, kapital dezenvolvimentu maibé ba kapital menor nian la tau ida.
“Iha kapital dezenvolvimentu ne’e ita tau US$30 mil ba hodi harii fatin hakmatek ba vitima violensia domestika nian,”informa Ministru Saude interinu Bonifacio dos Reis Maucoli ba jornalista sira hafoin halo aprezentasaun iha revizaun ba pakote Orsamentu Jeral Estadu 2020, iha Ministériu Finansas Aitarak Laran-Dili, tersa (10/09).
Governante ne’e hateten, orsamentu millaun US$47.5 ne’e Ministériu Saude sei aloka mós ba iha sentru saude neen (6) iha teritoriu laran, kada sentru saude sei hetan rihun US$5 atu harii fatin hakmatek nian nomós alokasaun ba iha transferensia publika nian.
“Ita iha mós proposta adisional nian ne’ebe hamutuk millaun US$3.7 para halo kompras ba iha ambulansia no kareta multi funsaun nian,” hatutan governante ne’e.
Orsamentu adisional millaun US$3.7 ne’e, nia hateten millaun US$1.4 atu sosa kateta multi funsaun hamutuk 11 nomós sosa ambulansia 11 ba munisipiu sira tanba ambulansia sira ne’ebé uza durante ne’e kuaze ninia kondisaun ladiak ona.
Ministru Saude interinu ne’e dehan, orsamentu adisional seluk ne’ebe mak ministériu koloka ne’e atu sosa mós ekipamentu mediku nian no ekipamentu non-mediku nian ba iha ospital referal sira nomós sentru saude, treinamentu sira iha Dili laran no munisipiu sira.
Nia hateten, dadauk ne’e kuaze kama sira iha ospital balun aat hotu ona tanba ne’e ho orsamentu adisional ne’e bele sosa sasan sira ne’e, sosa lensol, sumasu no sasan sira seluk nune’e bele fasilita ba pasiente sira.
“Ita mos tau orsamentu ba iha prestasaun kuidadu saude primaria nian iha munisipiu sira para bele hasa’e kobertura universal nian,” dehan Ministru interinu ne’e.
Nia informa, orsamentu ba kapital dezenvolvimentu nian konsentra iha Ministériu Obras Publika nian, Ministériu Saude rasik sei halo reuniaun para bele propoin nesesidade ministériu nian liu-liu liga ba iha area infraestrutura nian.
Nia hatutan, Ministériu Saude planea ona atu harii postu saude no klinika ba iha suku sira tuir identifikasaun ne’ebé mak iha ba populasaun sira tanba populasaun tenke liu rihun ida ba leten hodi bele fo atendimentu ba iha komunidade sira.
“Hau hanoin ho orsamentu tinan 2020 nian ida ne’e sufisiente ona para bele responde ba iha nesesidade sira ba iha tinan 2020 nian,” hakotu Ministru Bonifacio. (oro)
714 total views, 3 views today
Bele hare Video Seluk :