ADVERTISEMENT

Eukaristia: Memorial No Edifikasaun Kristo Nia Isin (Festa Solenidade Kristo nia Isin no Ran)

Timor Post - Relijiaun
  • Share
Corpo de Deus

Hosi Luis Pereira S.J

Kontexto!

ADVERTISEMENT
SCROLL FILA BA NOTISIA


Festa Santíssimo Corpo e Sangue de Cristo/Kristo nia futar isin no ran mak festa ida ne’ebé hahu iha sékulo XIII (1264) husi Papa Urbano IV núdar forma ida atu fo sasin ba prezensa real no konkreta Jesus-Kristo nian iha Eukaristia. Tamba ne’e, ita hetan konvite-bolu atu fo importansia ba Eukaristia ne’ebé ‘fo han/habokur’ ba ita nia klamar no ita nia isin/moris. Atu nuné, ita bele sai sasin publiku ba Eukaristia.

Ita hot-hotu han atu konserva ita nia moris. Kuaze lor-loron ita han paun. Paun mak hahan universal ida. Hahan ne’ebé mai husi rai. Hahan povo nian iha rai-fuik maran: ázimos, maná durante tinan 40 iha diresaun ba ‘terra prometida’. Nuné, hahan isin lolón nian ida. Maibé, ita preciza mós hahan ida ne’ebé fo brani/korazen, perseveransa no seguransa ba ita nia moris. Ita iha necesidade ba paun ida ne’ebé bele fo forsa ba ita an atu tahan terus no susar sira ne’ebé existe iha ita nia moris lor-loron nian.  Jesus mak ita nia paun moris nian ne’ebé sustenta, habokur, haforsa ita iha ita nia viazen iha lao rai ba lalehan (terra prometida iha testamento foun). Nia mak garantia no seguransa ba ita nia moris rohan laek nian. Tan ne’e, ita simu nia iha Eukaristia.

Iha Quinta-Feira Santa, ita aprende katak Jesus molok tama ba nia mistério paskua nian: Terus, Mate no Moris Hias, Nia hari ona eukaristia liu husi han kalan ikus hamutuk ho nia eskolante sira.

Evanjelista hatudu mai ita konaba preparasaun ‘Última Ceia nian’. Jesus haruka nia discípulo rua  ba uluk atu halo preparasaun sira ba selebrasaun ne’e. Selebrasaun ne’e, núdar memória libertasaun ida husi rai eskravidaun/atan nian ba rai libertasaun/pasazen husi eskravidaun/atan nian ba libertasaun. Iha Ceia Paskal ne’e, Jesus halo pasazen  husi Testamento Tuan ba Testamento Foun ou husi Aliansa Tuan ba Aliansa Foun ho nia isin no nia ran rasik. Nia foti paun, fo bensa dehan: “Imi simu ba, ne’e ha’u nia Isin ne’ebé ha’u saran ba imi. Tuir mai nia halo hanesan ba Calis hodi dehan: “Ne’e ha’u nia Ran, Ran moruk foun nian ne’ebé sei nakfakar tamba ema lubun bót”. Jesus FO liu husi paun no tua ne’ebé sai nia isin no ran rasik. Eukaristia mak prezensa real Jesus-Kristo nian. Ita preciza FIAR ho naroman Espírito Santo nian atu bele moris iha realidade ida ne’e.

Teolojikamente koalia, wainhira ita selebra Eukaristia, ita hatudu ita nia hakarak atu participa iha mistério paskal Kristo nian. Nuné, kada celebrasaun eukaristika mak ita halo ‘MEMORIAL’ ida. Memorial saidá?

  1. Memória Ultima-Ceia

Ita halo memória ba Jesus nia han kalan ikus ho discípulo sira. Han kalan ikus hanesan ‘SINAL PROFETIKU ida’ ne’ebé realiza iha vespra Jesus nia terus, mate no moris hias/EVENTO FUNDADOR. Hanesan mós pasazem povu Israel nian iha tasi  no han kalan iha vespra  iha Egito (paskua judaica). Nuné, iha han kalan ikus ne’e, profetikamente koalia, Jesus anunsia ona no tama ona ba nia terus, mate no moris hias, liu husi sinal mediasaun paun no tua. Iha Paun no tua, nia halo memória ida. Nuné, Ultima-Ceia ho Jesus nia terus, mate no moris hias eventu rua ne’ebé labele haketak malu (sinal profetiku no evento fundador).

Iha kada  Eukaristia ne’ebé ita selebra, ita tama iha ambiente última-Ceia nian; ita tama iha komunhaun ho Jesus no nia eskolante sira nian; ita tama iha Jesus nia terus, mate no moris hias nian. Tan ne’e, selebrasaun Eukaristika mak ita nia ‘modo/cara’ ba  ‘luku’ iha Ultima Ceia, Kalvario no rate mamuk: ita ba laós fisikamente, maibé, ita ba memorialmente-sakramentalmente liu husi paun no tua/ba iha Eukaristia iha nia totalidade.

Iha Eukaristia, ita kumpri vontade Naí Maromak nian. Jesus dehan Ha’u hakarak tebes han kalan ida ne’e hamutuk ho imi. Halo ida ne’e hodi hanoin ha’u (Lk 22,19). Ita halo memória ba Jesus nia moris katak nia paixaun.

Iha texto Saun Mateus no Joaun dehan laós deit paun moris ba ema maibé Lia Fuan hotu ne’ebé sai husi Maromak nia ibun. Sé mak han ha’u nia isin no hemu ha’u nia ran, HELA iha ha’u no  ha’u hela iha nia, hanesan ha’u Aman hela iha ha’u, ha’u iha nia. Nuné, sé mak simu ha’u, nia moris ba nafatin. Ida ne’e mak HAHAN ESPIRITUAL ne’ebé konsiste iha Paun no Tua no Lia-Fuan ne’ebé ita simu iha Eukaristia.

  1. Partilha-komunhaun!

Iha livro Exodus 12 haktuir konaba komprimiso ho paun katak laiha ema ida mak iha liu no laiha ema ida mak laiha buat ida atu han. Iha Eukaristia, ita hotu simu hanesan. Ita simu Maromak nia Futar Lia-Fuan husi ambaun: Meza Lia-Fuan nian no husi  Altar: Meza Eukaristia nian. Buat ne’ebé importante mak partilha iha prezensa Naí Jesus nian. Iha ambaun no altar, ita hotu sai ida deit: komunhaun-uniaun ho Naí Maromak. Nuné, Eukaristia mak Maromak nia horik fatin iha ita ema nia lét, iha ne’ebé, husi nebá moris espírito partilha no komunhaun nian.

  1. Fonte no sentro moris Kristaun nian

Eukaristia mak fonte no sentro ita nia moris kristaun nian. Jesus hasae nia isin no ran núdar karan atu soi ita ema. Portanto, iha Eukaristia ita alimenta ita isin no klamar ho Jesus nia Futar-Isin no Ran, ita mós proklama katak ita fiar iha prezensa real Jesus-Kristo nian iha ‘dom’ sira Eukaristia nian.

Ita habadak hodi dehan katak ohin ita hetan konvite atu fo sasin ba publiku prezensa real no konkreta Jesus nian iha Eukaristia. Mai ita ba simu nia, iha Eukaristia ho fuan no laran tomak, basá, Eukaristia mak momento ida ne’ebé liga ita husi: PRESENTE ba PASADO no ba FUTURO katak iha Eukaristia, ita tama iha ‘memoria’ Jesus nia última Ceia, nia paixaun, povu Israel nia experiensia paskua no sira nia pasazem iha tasi. Ita partilha, halo komunhaun-uniaun ho Maromak Trindade iha/liu husi nia Oan Mane Mesak, amlulik bót. Nuné, Eukaristia bele sai fonte no sentro ba ita nia moris. Halo ita sai ‘Igreja vivo’, ne’ebé fo sasin konaba Kristo Moris Hias.Amen!(lupersj)

 (Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)

 1,429 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Eukaristia: Memorial No Edifikasaun Kristo Nia …” A few seconds ago
Lee Mós :
Sarani Laran Metin iha Na'i Maromak Liuhosi Orasaun

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No