BAUKAU (timorpost.com) – Vise Ministru Administrasaun Estatál, Lino de Jesus Torrezão, akompaña husi Prezidente Autoridade Munisípiu Baukau no mós Diretór Jerál ba Dezenvolvimentu Rural, halo lansamentu ba Suku foun 2, “BUILAI no CAIBADA MAKASA’E” iha Postu Administrativu Baukau Vila, Munisípiu Baukau.
Governante ne’e hateten iha nia diskursu katak; Objetivu ne’ebé ita hotu hakarak atu oinsá harii Munisípiu, Postu Administrativu, Suku no mós hamosu Aldeia sira ne’e mak atu dada besik liután dezenvolvimentu mai iha povu nia leet no bele muda mós atendimentu sira ne’ebé dook sai besik liu tan.
“Ami mós sei rekomenda ba Ministru foun MAE ne’ebé sei mai, atu bele hatutan nafatin programa sira ne’ebé fó benefísiu ba povu sira, la’ós atu mai sobu ka mai halakon fali programa sira ne’ebé ita halo ona durante mandatu to ohin loron”.
Iha tempu hanesan, Prezidente AM Baukau hanesan mós Reprezentante husi Vise MAE hamutuk ho DJDR lansa mós Suku foun Builai iha Postu Administrativu Baukau Munisípiu Baukau.
Ikus liu Autoridade lokál no komunidade sira husi suku foun 2 ne’e simu mós Sertifikadu Rekoñesimentu husi MAE, Simbolikamente deklara katak, suku foun BUILAI no CAIBADA MAKASA’E eziste ona iha Timor-Leste.
Serimónia Lansamentu Suku foun ne’e partisipa mós husi Diretór Jerál MAE sira, Asesór Nasionál MAE, Komandante PNTL Baukau, Diretór PNDS Baukau, reprezentante Amu Pároku, Autoridade lokál sira, Veteranu/a, Lia na’in no mós komunidade sira.
1,464 total views, 6 views today
