ROMA (Timor Post) – Amu Papa Francisco agradese realizasaun enkontru ho enviadu Espesiál Extraordináriu Prezidente Repúlika, Kay Rala Xanana Gusmão, hodi diskute assuntu kona-ba rezolusaun konflitu no funu iha mundu tomak, hodi hametin paz no dezenvolvimentu no hadi’a povu nia moris.
Tuir Komunikadu imprensa, Timor Post Online asesu, Sábadu (27/08), katak Xanana Gusmão, orgullu ho mensajen Papa ba povu Timor-Leste, prosesu dezenvolvimentu nasionál no toleránsia iha sosiedade durante ukun aan, iha tinan 20 nia laran.
“Ha’u agradese bele hasoru sua-santidade Papa Francisco, nia agradese tebes hodi ha’u fó apresu boot tebes ba Timor-Leste, Prezidente no povu tomak, nune’e hodi Prezidente Repúblika nia naran, ha’u fó hatene katak, ita tuir hela atividade sua-santidade nian, liuliu kona-ba atu rezolve funu no buka meius hapara tiha funu iha Ukrania ho rai seluk agora ne’e,” dehan Xanana hafoin hasoru Papa, iha Palasiu Apostoliku Santa Sé Roma, iha loron 25 Agostu 2022.
Líder nasionál introduz ba Papa katak, Povu Timor-Leste akompaña atividade líder igreija ne’e, liuliu vizita ba Irake, hodi halo aprosimasaun ho relijiaun Islámika no esforsu ne’e nu’udar aktu ezemplár.
Tuir Xanana, Papa hatete Timor-Leste merese hetan Kardeál foun hanesan Arsebispu Arkedioseze Metropolitana Dili, Don Virgílio do Carmo da Silva no hanesan Kardeál nasaun seluk ne’ebé sei hetan investidura iha loron 27 Agostu 2022.
Líder Nasionál ne’e mós hateten, Prezidente Ramos Horta agradese Papa Fransisco ne’ebé temi no promove naran Timor-Leste ba mundu tomak, tanba implementa projetu rezolusaun númeru 93/V(4ª) kona-ba fraternidade umana no Koexisténsia Komum ho Umanidade no kona-ba asuntu ida ne’e, líder relijiaun sira iha Timor-Leste hahú koordena malu, hodi realiza programa oin-oin ne’ebé envolve juventude.
“Iha ami-nia konversa, ha’u temi mós kona-ba fraternidade umana hodi dehan katak, iha Timor-Leste ita hahú tiha ona programa hirak ne’e, iha fulan sira ne’e no sei hatudu tan iha fulan setembru 2022, no sei buka halo tinan-tinan hodi nune’e, loron ruma prepara aan di’ak liu tan, grupu sira hosi relijiaun oin-oin, Katólika, Kristaun, Musulmanu, Hindu no Konfusiu hodi bele ba aprezenta iha Jakarta, nune’e motiva relijaun sira seluk bele iha hanoin hadomi malu, respeita malu no kria dame,” fundamenta líder ne’e.
Timor-Leste nu’udar pais ki’ik ida ne’ebé maioria Katólika, sai ezemplu hodi promove nafatin toleránsia entre relijiaun no liberdade relijiaun iha nasaun sira, iha Rejiaun ASEAN no kaer metin prinsípiu hametin dame, hodi tane aas konseitu no prinsípiu Fraternidade Umana ne’ebé Papa Francisco promove ba mundu tomak.
Iha enkontru kuaze oras ida ne’e, Papa Francisco defende atu kontinua programa fraternidade umana iha pais hotu, atu hapara ona funu no apresia esforsu Timor-Leste hodi ajuda Papa nia programa.
“Amu Papa iha vontade liu, ita sente tebes nia kontente simu delegasaun ofisiál hosi Timor-Leste ne’ebé reprezenta Prezidente. Tanba ne’e, ha’u kontente no ha’u dehan ba nia, povu tomak sei reza ba ita boot nia saúde, tanba saída maka Papa halo, hodi ko’alia hasoru funu, ko’alia kona-ba pas, rekonsiliasaun no ko’alia dame entre relijiaun, buat hirak ne’e presiza korajen boot hanesan Papa Francisco iha vizaun boot tebes no hanoin luan haree ba mundu ohin loron,” dehan Xanana.
Tuir planu, Papa Francisco sei delega Vise Primeiru-Ministru Vatikanu atu vizita Timor-Leste iha loron 19 fulan-Setembru agora hodi inaugura Nunsiatura Apostólika Santa Sé iha Motaél, Dili, iha loron 21 ne’ebé prosesu konstrusaun remata ona.
Xanana Nu’udar Reprezentante Enviadu Espesiál Prezidente Repúblika, hato’o ba Amu Papa hodi povi Katólika Timor-Leste nia naran husu Amo Papa atu halo vizita ba Timor, haktuir mós katak, oras ne’e Timor-Leste nia reprezentasaun Vatikanu iha Dili, sei hala’o servisu hosi Nunsiatura Malázia reprezentante iha Dili hanesan de’it enkaregadu ba negósia hosi reprezentasaun Malázia mai Timor-Leste.
“Ho hanoin ida ne’e, Amu Papa hatán ho dehan, sei estabelese uluk nia reprezentasaun, hodi prienxe kriteria atu sai reprezentante permanente, no mós sei edifísiu ba funsionamentu servisu Reprezentasaun Santa Sé nian iha Estadu ne’ebé. Ho razaun hirak ne’e Amu Papa nia Vise Primeiru Ministru hosi Vatikanu sei vizita Timor-Leste atu haree besik liu kondisaun hodi prepara atu sai nu’udar nunsiatura ketak. Iha oportunidade ida ne’e, Reprezentante Amu Papa nian sei halo mós inaugurasaun ba edifísiu nunsiatura foun iha Dili,” haktuir Xanana.
Iha parte seluk, Xanana ho Papa diskute mós planu vizita ba Timor-Leste ne’ebé tuir loloos realiza iha tinan kotuk, maibe adia, tanba situasaun pandémika no iha possibilidade ajenda ba tinan oin.
“Ha’u husu katak, posibilidade Papa atu vizita ba Timor, maibé Papa esplika katak, nia husu deskulpa, lae tinan kotuk nia ba tiha ona Timor-Leste, maibé tanba moras COVID-19 mosu, maka nia la konsege ba, maibé ami ko’alia ho hamanasa uitoan, nia dehan haree tok tinan mai ne’e karik bele ba vizita,” dehan Xanana.
Xanana husu ba povu tomak atu hasa’e orasaun ba Na’i Maromak bele haraik nafatin bensaun no grasa ba Papa Fransisco nia kondisaun saúde ne’ebé tama ona idade 85.
Enkontru entre Xanana no Papa Francisco termina ho serimónia bensaun murak hosi Papa ba ekipa tomak inklui entrega prendas kaibauk no kafé Timor-Leste no Papa Francisco mós entrega prendas tersu no estatua, medalla agradesimentu no livru balun ne’ebé hetan bensaun entrega ba ekipa nu’udar sinal agradesimentu.
Hafoin enkontru ho Papa remata, Xanana oferese mós prendas Timor-Leste hanesan Tais, Kaibauk, Morten no kafe Timor-Leste ba Sekretariu Estadu Vatikanu, Kardeál Pietro Parolin, Msgr. Edgar Parra, Suplente Ba Asuntu Jerál ba Sekretariu Estadu Vatikanu, Sekretariu Relasaun ba Estadu Vatikanu, Arsebispu Paul Gallagher, Sekretary of Relation With States, Joseph Murphy, Head of Protocol of the Vatican no Msgr. Bruno Bastos Lins, Deputy of Head of Protocol.
Delegasaun Timor-Leste ne’ebé akompaña Xanana hasoru Papa Francisco kompostu hosi Assesór Directo e Politiku Prezidente Repúblika, Tomás do Rosario Cabrál, Assesora Administrasaun Finasas Palásiu Prezidente, Dirce dos Reis Amaral, Asistente Enviadu, Vanessa Pereira, Ofisiál Fotografu Media Prezidente Repúblika, Eugénio Pereira da Silva no akompaña direita hosi Embaixadora Timor-Leste ba Vatikanu, Juvita Rodrigues B. Ataide Gonçalves ho ekipa Protokolu, Sausia Soares no Jennifer Ventanilla.
2,100 total views, 3 views today
Bele hare Video Seluk :
Subscribe to Timorpost
