DILI (timorpost.com) — Prezidente Komisaun C Parlamentu Nasionál, Trata Asuntu Finansas Publika, Cidelizia Faria dos Santos, hatete, Timoroan sira nia mentalidade seidauk di’ak atu kompete iha merkadu ASEAN.
Nia dehan, hela tinan ida ka rua Timor-Leste atu adere ona ba iha ASEAN, maibé klaru katak haree ba ekonomia rai laran no Timoroan sira nia mentalidade sei iha problema atu ba kompete iha merkadu ASEAN nian.
“Los duni ita rekoñese katak, ita Timoroan sira ita nia mentalidade mós sei iha problema, maibé ha’u hanoin tinan rua ne’e natoon ona espera ita hotu-hotu esforsu-an no governu tan esforsu maka’as iha sira nia parte, ha’u fiar ita bele muda ita nia mentalidade,” Cidelizia hateten iha Paramentu Nasionál, Kinta (07/09).
Tanba ne’e, sira nia parte hanesan komisaun, halo enkontru ida ho ekipa ida mai husi Jenebra husi Organizasaun Mundial Komérsiu nian, entaun sira esplika Timor-Leste sai hanesan observadór ba Organizasaun Mundiál Komérsiu iha tinan 2016.
Entaun iha tinan oin 2024, iha fulan Fevereiru, tuir planu Timor-Leste sai ona membru kompletu ba iha Organizasaun Mundiál Komérsiu ida ne’e, tanba ne’e mak Parlamentu iha papél kuandu sai ona full-member, Timor-Leste sei lori konvensaun ruma mai atu ratifika iha Parlamentu Nasionál liuliu kona-ba protokolu doméstiku nian.
“Tanba ne’e mak ohin sira dehan kuaze iha lei hamutuk 11 hanesan ne’e, maibé la’ós papél parlamentu nian, governu mak sei halo de’it aprovasaun liuhusi dekretu governu nian, entaun prosesu ida mós kuandu ita atu adere ba ASEAN ita mós tenke sai ona membru ba organizasaun mundiál komérsiu ne’e,” nia deklara.
Entaun ida ne’e iha ligasaun ho servisu sira nian no ligasaun mós ho Timor-Leste atu sai membru ASEAN tuir planu ne’ebé mak iha ona, governu dehan iha 2025 nia laran, entaun ida ne’e mak ohin hanesan diskusaun iha reuniaun refere.
“Ne’ebé diskusaun ne’e ko’alia barak liu kona-ba papél ida ne’ebé mak Parlamentu Nasionál atu halo, liu-liu servisu komisaun C nian, tanba ita boot sira hatene komisaun C nia servisu halai mós ba iha area sira nia servisu ba ne’e,” nia esplika.
Agora, prosesu atu adere ba iha ASEAN ne’e bele ona ka lae, ne’e sei iha prosesu nia laran, tanba ida ne’e mak governu deside iha tinan 2025 mak foin bele adere, maibé la signifika Timor-Leste di’ak liu ka aat liu, maibé 50% ka 60% bele ona.
4,292 total views, 3 views today
Bele hare Video Seluk :
Subscribe to Timorpost
