DILI (timorpost.com)—Organizasaun Nasoins Unidas (ONU), hato’o karta ofisiál mai Xefe Estadu Maiór Jenerál FALINTILForsa Defeza Timor-Leste (F-FDTL), Tenente Jenerál Domingos Raul “Falur Rate Laek”, atu nomeia membru F-FDTL sira partisipa tan misaun pás, ne’ebé hala’o iha Sudaun Súl, iha tinan ida ne’e.
Tenente Jenerál informa ba jornalista sira, hafoin partisipa iha misa kuarta feira sinzas, ne’ebé realiza iha Kuartél Jerál F-FDTL Fatuhada, Kuarta (14/02/2024).
“ONU mós haruka tan ona karta ofisiál ida mai ha’u no ha’u simu ona karta ne’e, iha karta ne’e, ONU husu para Komandu F-FDTL nomeia ofisiál superiór F-FDTL, atu partisipa iha misaun pás iha Sudaun Súl tinan ne’e. Tanba ne’e hanesan Xefe Estadu Maiór Jenerál F-FDTL, ha’u nomeia tiha ona ofisiál F-FDTL feto ida nia maka sei ba partisipa misaun pás iha Sudaun Súl,” Falur hateten.
Tenente Jenerál ne’e lakohi fó sai naran Ofisiál Superiór ne’ebé nomeia ona, atu partisipa misaun pás iha Sudaun Súl, tanba ida ne’e regra Komandu F-FDTL nian. Bainhira ofisiál superiór ne’e ba ona Sudaun Súl maka públiku foin hatene, tanba Komandu F-FDTL sei halo serimónia boot ba dezlokamentu ofisiál superiór ba Sudaun Súl ne’e.
Ba oin, membru F-FDTL barak maka sei partisipasaun iha misaun pás, ne’ebé hala’o iha Sudaun Súl no nasaun sira seluk tan.Tanba ne’e maka Komandu F-FDTL prepara ona membru F-FDTL barak, atu tuir formasaun lian Inglés no Portugés inklui formasaun sira seluk iha Sentru Instrusaun Nicolau Lobato Metinaru.
“Ita nia partisipasaun sei kontinua, tanba foin daudaun ha’u ba tuir enkontru ida iha Bankók Tailándia, nasaun sira ASEAN nian husu para ita nia forsa hamutuk ho nasaun ASEAN sira, atu partisipa misaun pás, maibé ida ne’e depende ba desizaun polítiku hakarak ita nian forsa hira maka partisipa, osan ba ida ne’e oinsá ita sei haree hotu ba ida ne’e hotu, maibé hanesan forsa ita prontu atu bainhira desizaun iha ona”, nia hakotu.
3,450 total views, 3 views today
Bele hare Video Seluk :