(Reportájen Olga Soares/Editor Suzana Cardoso)
DILI (Timor Post) – Kazu pozitivu Covid-19 iha Timor-Leste (TL) ne’ebé loron ba loron aumenta ba beibeik sei fó amiasa ba fasilidade sira ne’ebé menus iha fatin izolamentu hodi responde pasiente Covid-19.
“Fasilidade menus sai preokupasaun boot ba Sala Situasaun Sentru Integradu Jestaun Krize (SS-SJIK) ho Ministériu Saúde (MS). Situasaun ne’e akontese iha Timor laran tomak. Maibé governu obrigasaun atu meilhora no hadia di’ak liu tan kondisoens hirak ne’e.”
Lee moos Notisia: Profesionál Saúde Simu Doasaun Ekipamentu Husi EUA
Perkupasaun ne’e hato’o hosi Segundu Komandante Operasaun SS-SIJK, Brigadeiru Jenerál, João Miranda Aluk Descartes ba Timor Post hafoin remata serimonia simu no intrega ekipamentus médiku Covid-19 nian husi Embaixadór EUA, Kevin Blackstone iha SS-SIJK, Sentru Konvensaun Dili, Kuarta (28/04/2021).
Aluk rekuñese katak, kazu Covid-19 ne’ebé kada loron aumenta ba beibeik halo fasilidade sira iha izolamentu Vera Cruz, Tasi Tolu no sentru izolamentu iha munisípiu sira komesa menus para responde pasiente Covid-19 sira.
Jenerál ne’e hatutan, SS-SIJK ho MS iha ona planu atu impresta eskola balun hodi sai hanesan fatin izolamentu. “Maibé planu ne’ebé iha tenke liu hosi desizaun Konsellu Ministru. Maski ami laiha ona fasilidade. Hakarak ka lakohi tenki halai ba fasilidade hirak ne’ebé ita iha ne’e deit,” dehan Aluk.
Kazu ne’ebé aumenta tuir Aluk, maioria mai husi estudante ne’ebé husu autórizasaun sai husi Dili ba munisípiu. Antes atu ba munisipiu sempre halo teste swab, maka deteta pozitivu tenki tama karantena. Maibé sira ne’ebé negativu hetan autorizasaun ba foho.
Aluk esplika, iha loron hirak liu ba estudante ida nu’udar mós Aluk nia alin husi Lospalos husu pedidu autorizasaun husi SS-SIJK atu ba Lospalos ho motor. To’o iha Manatuto tula tan nia kolega ne’ebé lahalo teste swab maka polisia kaer tama karantena.
Hateten Aluk, sira ne’ebé atu ba munisipiu tenki tuir teste swab negativu maka foin hetan autorizasaun ba munisipiu. Sira ne’ebé fila hosi munisipiu atu mai Kapital Dili mós hanesan tenki tuir teste swab. Negativu kontinua viajen mai Dili. Kuandu pozitivu tama karantena.
“Ha’u nia alin nia oan mane ida atu ba Lospalos tuir teste swab. Rezultadu negative maka sai husi Dili ho motor mesak. Too iha Manatutu nia tula fali ema balun ne’ebé la tuir teste. Hafoin too iha Lospalos polisia deteta,” katak Aluk hodi hatutan.
Tanba pasajeirus hosi Manatuto ne’e laiha sertifikadu negativu maka sira hotu tenki ba kuarentena. Tama tiha kuarentena hasai swab pasajeirus hosi Manatuto ne’e pozitvu. Ida ne’e maka akontese hodi aumenta Covid-19 aumenta ba beibeik.(Lee notísia seluk iha Jornál Timor Post)
771 total views, 3 views today
Bele hare Video Seluk :
Subscribe to Timorpost
