DILI (Timor Post)—Prezidente Repúblika Francisco Guterres Lú Olo liuhusi Xefe Uma Sivíl Francisco Maria Vasconcelos fó apoiu umanitária ba vítima ahi haan (inséndio) eis Merkadu Komoro, Dili iha fulan hirak liu ba.
Xefe Uma Sivíl, Francisco Maria Vasconcelos bainhira lori direta apoiu umanitáriu ba vítima sira subliña, Prezidente Repúblika hanoin tebes ninia povu ne’ebé hetan susar.
Prezidente Repúblika halo koordenasaun mós ho governu, buka dalan oinsá fó tulun balu ba vítima sira, tanba responsabilidade tomak iha governu.
“Buka meius hodi tulun ba ita boot sira, la’ós barak maibé uitoan, uitoan ita bele tau hamutuk ita bele kompleta malu,” Vasconcelos subliña iha nia intervensaun iha eis Merkadu Komoro, Aldeia 03, Suku Fatuhada, Dili, Segunda (18/10/2021).
Sasán sira ne’e mak hanesan semente saka 657, roupa sakola 219, besi kotak 20×30 iha kaixa 438, besik kotak 20×40 iha kaixa 657, besik kotak 30×30 iha kaixa 657 no mós baut dos rua no kalén 438. No total vítima inséndiu ne’ebé simu apoia material konstrusaun ne’e, iha familia 219.
“Sasán sira ne’e, kada família ida hetan semente saka 3, roupa sakola 1, besi kotak 20×30 kaixa rua, besik kotak 20×40 iha kaixa 3, 30×30 iha 3, no ikus baut kalén rua,” nia informa.
Ho apoia ida ne’e, nia dehan, bele hadi’a no bele restaura fila-fali situasaun, ajuda ne’ebé fahe ba vítima sira ne’e hanesan forma ida ne’ebé prezidente nia responsabilidade hodi tulun vítima sira.
“Sasán sira ne’ebé ajuda, dala ruma la barak, maibé importante mak ita nia relasaun domin, ajuda malu hanesan umanu,” nia dehan.
Tuir Vasconcelos, apoiu hanesan ne’e la’ós ba vítima sira iha eis merkadu Komoro ne’e de’it, maibé ba vítima sira seluk, balu iha foho ne’ebá prezidente ajuda, presiza tulun ninia povu sira.
Tanba ne’e, nia espera, sasán sira ne’ebé distribui ba vítima sira, ita boot sira bele uza halo didi’ak, hodi hadi’a sira nia kondisaun.
Portantu, reprezentante vítima, Gaspar Guterres, afirma inséndiu ne’ebé akontese iha fulan Jullu ba ne’e, família besik 300 mak sai vítima ba akontesimentu ne’e.
Nia rekonese, katak governu ajuda ona vítima sira ne’e maibé ida ne’e seidauk sufisiente ba sira no dadaun ne’e sira iha hela prosesu rekonstrusaun.
Tanbe ne’e, nia agradese en nome vítima sira ba apoiu ne’ebé Uma Sivíl PR fo ona sira.
“Agradese boot no obrigadu barak ba apoiu sira ne’e, espera katak ho apoiu hira ne’e bele hamenus ona vítima sira nia preokupasaun ne’ebé mak durante sira sente,” nia agradese.
Vítima sira mós husu ba EDTL hodi instala fali sira nia ahi ba sira nia uma ne’ebé sira konstrui fali ne’e.
“Tanba vítima nia uma balun halo ona, maibé instalasaun ahi ba uma mak sidauk, ida ne’e mós bele prezudika ba vítima sira nia vida,” nia remata. (61L)
671 total views, 3 views today
Bele hare Video Seluk :
Subscribe to Timorpost
