DILI (timorpost.com) – Prezidente Autoridade Rejiaun Administrativa Espesiál Oe-Kusi Ambenu (RAEOA), Arsénio Bano, hatete ezekusaun orsamentu jerál estadu (OJE) 2022, to’o ona porsentu 42.
“Ezekusaun orsamentu jerál estadu 2022 ninian, RAEOA, foin to’o de’it porsentu 42, ohin ha’u informa hotu ba Primeiru Ministru,” nia hateten iha Faról, Segunda (17/10).
Nia dehan, kona-ba projetu estrada area Citrana nian iha primeira etapa la’o daudaun hela, fó ona servisu ba parte tékniku sira, tanba kompañia manan na’in ne’e iha ona.
“Iha semana ne’e ita sei halo desizaun ba estuda diresaun Tono Oesilu, ne’e ba projetu estrada nasionál ninian,” nia hateten.
Tanba ne’e nia parte mós sei bolu Primeiru Ministru, Taur Matan Ruak, hodi bele ba vizita Rejiaun Administrativu Espesiál Oe-Kusi Ambenu.
“Ami mós sei bolu Primeiru Ministru ba halo vizita iha RAEOA, iha loron 28 no 29 fulan Novembru, hodi halo lansamentu ba estrada Tono Oesilu ninian,” hateten nia.
Nune’e aproveita kedas Primeiru Ministru, Taur Matan Ruak, sei halo mós inaugurasaun ba estrada rurál Bihala Kutete ninian. Enkuantu sira seluk kuandu remata sei kontinua bolu Primeiru Ministru, hodi ba halo inaugurasaun.
Portantu Bazeia livru 3C (RAEOA-ZEESM TL) ne’ebé Timor Post Online asesu hosi publikasaun Agência Tatoli, katak totál despeza Orsamentu Jerál Estadu (OJE) 2022 hamutuk $84,436,784.00 ho deskrisaun ba kategoria saláriu no vensimentu $11,086,859.00, bens (sasán) no servisu $21,361,440.00, transferénsia públika $4,322,027.00, kapitál minor $607,155.00 no kapitál dezenvolvimentu $47,059,303.00.
Hosi montante refere atu finansia programa 15, sub-programa 95 no atividade 265, fonte orsamentu ne’e montante $37,377,481.00 mai hosi Governu sentrál hodi finansia kategoria saláriu vensimentu, bens servisu no kapitál minor.
Nune’e mós transferénsia públika hamutuk $47,059,303.00 mai hosi RAEOA rasik atu finansia ba iha kategoria kapitál dezenvolvimentu.
Hosi totál orsamentu 2022 maioria koloka tuir persentajén kategoria hanesan fundu kapitál dezenvolvimentu 55.73%, bens servisu 25.30%, saláriu vensimnetu 13.13%, transferénsia públika 5.12% no kapitál minor 0.72%.
Saláriu vensimentu
Despeza ba kategoria ida ne’e hamutuk $11,086,859.00 hodi asegura saláriu ba funsionáriu hamutuk ema na’in-2500 ne’ebé dezagrega iha Gabinete Prezidente Autoridade, Adjunta Prezidente Autoridade atu reforsa institusionál, Adjuntu Prezidente Autoridade ba Asuntu sosiál no iha Sekretáriu Rejionál na’in-hitu (7) iha RAEOA-ZEEMS TL.
Bens servisu
Totál despeza ba kategoria ida ne’e, hamutuk $21,361,440, hodi asegura kustu operasionál ba Prezidente Autoridade, Adjuntu Prezidente Autoridade no Sekretáriu Rejionál sira hodi implementa programa, sub-programa no atividade iha RAEOA-ZEESM TL
Kapitál Minór
Orsamentu iha kategória ida ne’e hamutuk $607,155.00 ba tinan 2022 atu asegura kondisaun bázika ba Gabinete Prezidente Autoridade no Gabinete Sekretária Rejionál Finansa, Sekretária Rejionál Edukasaun no Solidariedade Sosiál.
Kapitál dezenvolvimentu
Ho montante $47,059, 303.00 ba 2022, RAEOA-ZEESM TL prefere orsamentu hosi likidéz própriu.
Transferénsia públika
Totál dezpeza ida-ne’e hamutuk $4,322,027.00 hodi asegura kustu ne’ebé ho natureza subvensaun públika. Liña rúbrika ida-ne’e nu’udar responsabilidade tomak hosi Prezidente Autoridade hola desizaun ba despeza. Despeza hirak-ne’e koloka ba assosiasaun kooperativa, ONGs UNDP, subsídiu ba konsellu suku, PAAS no dezaztre naturál, merenda eskolár no konsesaun eskolár
2,390 total views, 3 views today
Bele hare Video Seluk :
Subscribe to Timorpost
