(Reportajen Jose Mauno/Editor Mateus da Cruz)
DILI (Timor Post)—Komisaun Anti Korrupsaun (KAK) hala’o sosializasaun ba kargu xefia sira iha Ministériu Edukasaun Juventude no Desportu (MEJD) kona-ba oinsá atu aprezenta riku soin liu husi sistema online, iha atividade ne’e KAK husu ba kargu xefia sira atu presta deklarasaun prazu to’o loron 11 Juñu 2022, bainhira la kumpre sei ko’a sira nia saláriu 25%.
“Ohin KAK hala’o iha ministériu edukasaun juventude no desportu Tanba kargu xefia iha MEJD ninia dateline ne’e loron tolunulu hahú husi 11 Maiu to’o 11 Juñu 2022 prazu hotu entaun ita haree se mak seidauk deklara no aprezenta riku soin, lei ne’e hatete katak, aprezentasaun riku soin tarde sei ko’a saláriu 25% husi saláriu mensal”, diretór inspesaun no monitorizasaun KAK, Antonino Alves da Cruz, deklara ba jornalista sira iha Balidi, kuarta (02/06).
Nia hatete, Atividade sosializasaun ida ne’e halo atu deklarante sira ne’ebé seidauk aprezenta bele aprezenta ona tanba iha lei hatete bainhira aprezenta tarde sei hetan sansaun. Liu husi sansaun ne’e obriga sira tenke hahú hanoin ona fó prioridade no atensaun maka’as ba aprezentasaun riku soin nian.
“Ita bele dehan daudaun dadus kuaze 300 liu mak halo aprezentasaun tarde maibé agora halo hela notifikasaun ba justifika no prosesu sei la’o tuir ninia dalan, kuandu la kumpre mak ita foin to’o ko’a saláriu”, nia dehan.
Tuir dadus husi KAK, instituisaun ne’ebé arelagu hamutuk 102 no deklarante sujeita ona rihun 5.029. maibé agora daudauk KAK konvida ona instituisaun 57 atu presta deklarasaun inklui ministériu edukasaun juventude no desportu.
Iha fatin hanesan, Diretór Jerál Administrasaun no Finansas MEJD, Antonino Pires, hatete, ohin loron tékniku husi KAK mai hala’o sosializasaun ba kargu xefia iha MEJD kona-ba oinsá atu aprezenta riku soin liu husi sistema online.
“Ami haree katak sosializasaun ne’e di’ak tanba para bele ajuda funsionáriu ne’ebé kaer kargu iha MEJD bele prienxe deklarasaun di’ak no hetan susesu”, nia hateten.
Diretór Jerál Antonino espera dirijente iha MEJD hahú husi nasionál to’o diretór eskola, adjuntu bele prienxe deklarasaun riku soin. Tanba MEJD kuaze iha ema rihun 2 mak kargu xefia tanba eskola ida mós iha kargu tolu.
“Diretór eskola sira presiza atu prienxe deklarasaun riku soin tanba assume kargu. Ha’u hanoin MEJD kuaze 60% rejistu ona hela 40% mak sei iha hela prosesu” nia dehan.(Lee Notísia Seluk Iha Jornál Timor Post/ Asesu You Tube Timor Post)
956 total views, 3 views today
Bele hare Video Seluk :