DILI, (timorpost.com)— Tribunál Judisiál Primeira Instánsia Dili (TJPID), liuhosi Juis turnu, Jumiati Freita, deside aplika medida koasaun Termu Indentidade Rezidénsia (TIR) ba arguidu sira ho naran inisiál AC, AP no AL, ne’ebé deskonfia ameasa ekipa inspesaun taka bola goling ne’ebé lidera husi Sekretáriu Estadu Asuntu Toponímia Organizasaun Urbana (SEATOU), Germano Santa Birtes, iha área Aitarak-Laran, postu adminitrarivu Dom Aleixo, munisípiu Dili.
Defeza ba arguidu sira, Defensór Públiku, José Maria da Costa Guteres, hatete kazu primeiru introgatóriu ne’e tanba deskonfia arguidu na’in-3 tenta ameasa ekipa inspesaun taka bola goling ne’ebé lidera husi Sekretáriu Estadu Asuntu Toponímia Organizasaun Urbana (SEATOU), Germano Santa Birtes, tanba ne’e Ministériu Públiku promove arguidu na’in-3 ho krime obstrusaun ba autoridade públiku inklui jogu elisitus ne’ebé previstu iha artigu 253 iha Kódigu Penál Timor-Leste.
Maibé, bazeia ba argudiu sira konfensa katak, sira loke jogu bola goling ne’e la’os ilegál maibé sira iha karta lisensa, tanba ne’e, iha premeira introgatóriu laiha provas ida katak arguidu halo obstrusaun ba autoridade públiku.
“Iha desizaun ne’e tribunál intende no aplika medida Termus Indentidade Rezidénsia (TIR) ba arguidu sira, tanba razaun laiha indísu forte katak sira komete krime obstrusaun ba autoridade públiku inklui jogu elisitus”, dehan Defeza iha Tribunál Judisiál Primeira Instánsia Dili (TJPID), Tersa, (19/02).
Iha prosesu primeiru introgatóriu ne’e mós Ministúriu Públiku liuhosi prokuradór, Reinato Bere Nahac, husu ba Tribunál atu aplika medida koasaun Apresentasaun Perioridika (AP) ba argudu sira, atu kada fulan ida apresenta-an iha eskudra ne’ebé besik.
Enkuantu parte defeza husu ba tribunál atu aplika medida koasaun Termu Indentidade Rezidensia (TIR) ba arguidu sira, razaun tanba laiha faktu provadu no laiha indísiu krime ba iha krime ne’ebé Ministériu Públiku promove ba sira, tanba ne’e mak defeza husu para atu aplika medida TIR.
Nune’e mós arguidu na’in-3 konfesa katak promete sei kopera ho Tribunál no Ministériu Públiku no inklui Polísia ba kualker investigasaun, liga ho kazu ida-ne’e.
“Ha’u hanoin katak, maske Tribuanál aplika ona medida kaosaun TIR ba argudiu sira, maibé parte Ministériu Públiku sei kontinua halo investigasaun ba kazu ida-ne’e, karik mak iha duni faktu katak arguidu sira komete krime ne’ebé Ministériu Públiku promove ba sira, entaun parte Ministériu Públiku sei halo akusazaun hasoru arguidu sira, maibé see karik laiha prova entaun tenke halo arkivamentu ba kazu ida-ne’e”, defensór hatete.
Enterantu kazu ne’e akontese iha loron 16 Fulan-Marsu tinan 2024 iha tuku 10: 00 iha área Aitarak-Laran, postu adminitrarivu Dom Aleixo, munisípiu Dili.
Antes ne’e, arguidu sira kompri ona oras 72, molok submete ba iha prosesu primeiru introgatóriu iha Tribunál Judisiál Primeira Instánsia Dili.
Iha prosesu primeiru introgatóriu ne’e prezide husi juiz turnu, Jumiati Freita, Ministériu Públiku representa husi Prokuradór, Reinato Bere Nahac, no arguidu sira hetan asisténsia legál husi Defensór Públiku, José Maria da Costa Guteres.(*)
903 total views, 3 views today
Bele hare Video Seluk :
Subscribe to Timorpost
