DILI-Autoridade Munisípiu Dili (AMD) liuhusi servisu jestaun merkadu munisípiu Dili (SJMMD), servisu hamutuk ho Polisia Eskuadra Postu Bekora no Polisia Eskuadra Postu Kristu Rei, simu despaxu hosi Tribunál hodi hasai Xefe Família uma-kain 12.
Xefe Departamentu Servisu Jestaun Merkadu, Gaspar da Silva, hatete sira servisu hamutuk ho PNTL hodi ba hasai xefe família 12 ne’ebé antes ne’e okupa rai estadu iha Metiaut hodi hela hodi buka moris ka buka servisu hodi hetan osan atu bele responde ba nesesidade família nian.
“Ami hetan despaxu husi PAMD no liuhusi Ministériu Justisa no Tribunal ne’ebé fó despaxu administrativu mai iha AMD hodi servisu hamutuk ho PNTL hodi hasai xefe família uma-kain 12 ne’ebé okupa rai estadu iha suku Metiaut, aldeia Karunggu-lau ba fali fatin seluk”, nia hateten ba Timor Post iha merkadu Taibesi, Sesta (14/04).
Nia dehan, sira simu despaxu loron rua ne’e apoiu Tribunal hodi ba hasai xefe família 12 ne’ebé okupa hela rai estadu muda fali ba fatin seluk, atu nune’e iha tempu badak rai refere bele uza fali ba halo buat seluk.
Portantu xefe ne’e konta, sira apoiu servisu Tribunal bazeia ba despaxu ne’ebé fó ba AMD ho PNTL atu hasai obrigatóriu xefe família hirak ne’e, maibé atu kria fali fatin ba xefe família hirak ne’e kompeténsia husi Tribunal no Ministériu Justisa maka hatene.
Tuir nia, ema hotu moris iha lei nia okos maibé kuandu komete krime estadu iha diretu atu prosesu tuir lei haruka maski hanesan sidadaun Timor maibé tenke hakru’uk ba lei.
2,379 total views, 6 views today
Bele hare Video Seluk :
Subscribe to Timorpost
