DILI, (timorpost.com) — Família husi saudozu Amândio de Sá Benevídes husu Estadu atu-taman ba feto faluk no oan ki’ak ne’ebé saudózu husik hela. Saudozu asumi responsabilidade importante nu’udar Ministru Justisa iha Governu Konstitusionál da-IX to’o hakotu iis iha Sábadu, 20 fulan-Janéiru 2024.
Oan mane haki’ak, Rui Fatima Martins, sente triste no lakon tebes aman ne’ebé durante ne’e servisu maka’as ba família liuliu ba oan sira.
“Nu’udar oan haki’ak hakarak hato’o hela sentiementu triste ida-ne’e no Estadu nia, saudozu husik hela nia espoza no kazada di’ak ida no husik hela oan na’in-4, na’in-2 boot bele la’o mesak maibé seidauk servisu no na’in ida tinan 9 no ida foin tinan 2, ne’e mak feto ikun,” Oan haki’ak, Rui Fátima Martins, ba jornalista sira iha nia rezidénsia Malinamuk, Domingu, (22/01).
Nia hatutan, triste sira-nia aman husik hela sira, no família bo’ot sente lakon avó, maun no aman laran di’ak ne’ebé hakarak serví no dedika-an maka’as ba rai ida-ne’e durante rezisténsia to’o ohin loron.
Saudozu Ministru Justisa ne’e nia hakat husik sentimentu moruk no husik hela tristeza ba faluk no oan ki’ak na’in-4.
Iha loron 20 fulan-Janéiru 2024 iha tuku 01:55 meudia feto faluk no oan na’in-4 simu novidade tristeza katak sira-nia aman no parséiru di’ak iha uma laran hakat dook ona no laiha liafuan ida mak tatoli hela ba sira na’in-5 ne’ebé durante ne’e sai membru família husi aman Amândio de Sá Benevídes.(*)
903 total views, 3 views today
Bele hare Video Seluk :
Subscribe to Timorpost
