(Domingo Reissureisaun. Act. 10, 34-43; Sal. 118; Col. 3, 1-4/1Cor. 5, 6-8; Jo. 20, 1-9)
Hosi: Luis Pereira S.J
Kontexto!
Ita bele imajina nakukun dader nian namihis ba daudaun, loron matan hahu nahe-an mai, sinal katak inicio husi loron foun ida, kriasaun foun ida iha ita nia historia humanidade nian. Liu tiha silensiu, LIA-FUAN moris hikas fali, nia mak ida kria (Genesis) no nia mak soi (palavra performativa). Alleluia!
Jesus nia moris hias hatudu katak SILENSIU Naí Maromak nian, silensiu ida ne’ebé produtivo ou silensiu ida ne’ebé fo fuan hanesan fini ne’ebé monu, mate, atu bele fo fuan, no fo fuan barak. Silensiu Maromak nian permite atu mate transforma ba moris. Rate sai tiha ponte ba moris no ksolok nian.
Apostolo sira deskobre rate mamuk ona. “Ema lori tiha ona Naí husi rate”, haktuir Maria Madalena. Fatin mamuk “vazio, ausensia” sai tiha naroman bót ida hanesan hori kalan ita esperiensia no hanesan Maria Madalena esperiensia. Silensiu Maromak nian núdar konvite ida ba ita nia fiar no esperansa atu fihir ba Oan Mane Mesak núdar ida ne’ebé hadomi iha lia-fuan ho fuan, hatudo iha hahalok lia-fuan ho domin”.
Iha Kruz, nia hakoak imi no ha’u, laós tambá ita merese, maibé tambá nia hadomi!. Domin ida ne’e mak halo nia mate, domin ida ne’e mós mak halo nia moris hias fali. Nuné, iha domin, la existe lia-fuan mate, iha deit mak moris/vida, moris naresin no moris hias.
Ponto 3 ita bele reflete hamutuk:
- Haré́ ba Jesus!
Saun João iha evanjelhu dehan apostolo ida ne’ebé Jesus hadomi liu, haré ho matan no fiar duni, Maria Madalena no Pedro mós haré no fiar katak Jesus Moris Hias ona. Atu bele to’o ba haré, ita preciza buka hatene nia, konhese nia no lao tuir nia hanesan apostolo nain 3 ne’e.
Maria Madalena ne’ebé esperiensia rasik Jesus nia domin no perdaun, kresce liu tan iha domin no fiar ba Jesus maski nia la kompriende mistério Lia-Foun Diak Salvasaun nian ne’ebé Jesus haklaken, moris no hanorin. Ita hotu ne’ebé lao tuir Jesus núdar sarani, hetan konvite atu haré ba Jesus hanesan horizonte foun/belo horizonte.
Jesus moris hias kontinua hatudu nia liman no ain kanek sira mai ita, liu husi maun-alin sira ne’ebé iha terus no susar laran. Nuné, ita preciza matan espiritual ida atu bele haré ninia prezensa iha ita nia moris lor-loron nian. Nia kontinua bolu ita atu haré ba nia iha ita nia uma laran, iha ita nia vizinho sira, iha ita nia maun-alin sira, iha evento sira ne’ebé akontece, iha natureza nst. Importante ba ita mak LOKE ITA NIA MATAN FIAR NIAN atu bele haré.
- Fiar iha Maromak!
Jesus mak revela Aman Maromak nia laran-luak, nia domin ba ita ema. Iha nia mak ita haré Aman Maromak ida ne’ebé ita la bele haré. Tan ne’e, iha Jesus, Naí Maromak mai hasoru ita no ita ba hasoru Maromak. Nuné, ita preciza deít atitude fiar atu bele koko Naí Maromak nia domin no laran-diak iha Jesus-Kristo. Fiar iha Oan Mane Mesak signifika adere ba nia, nia projeto no nia moris. Ita aprende husi nia lisaun domin no fo moris ba ema seluk: hadomi malu ba, hanesan ha’u hadomi imi. Ida ne’e mak sei lori ita ba moris rohan laek.
Tan ne’e, objetivo husi Aman Maromak haruka nia Oan Mane Mesak mai iha mundo mak atu liberta ema husi hanoin-an deít/egoismo, husi atan/eskravidaun sala nian, husi isolamento/alienasaun ho ema seluk, husi mate no fo moris rohan laek. Ho Jesus nia mate iha kruz, ita ema aprende katak moris konsiste iha obidensia ba plano salvasaun Aman Maromak nian no ita nia moris núdar dom ida ba maun alin sira.
João mós defini klaru konaba dalan ne’ebé ita ema tenki tuir atu to’o ba salvasaun mak FIAR iha Jesus, Oan Mane Mesak. Fiar iha Jesus la signifika adere iha konhesimento ou teoria deít ba lia-los ruma konaba fiar nian maibé RONA Jesus, SIMU nia no RAI nia mensajem no nia valor sira no LAO TUIR nia iha dalan domin nian. Ida ne’e mak ‘senha/password’ acesu ba rede lalehan nian. Ida ne’e mak halo ema ida sai discípulo(a)/kristaun lolós ne’ebé metin iha fiar.
- Haklaken Lia-Foun ksolok!
Ita preciza haklaken rate mamuk, vitoria certeza Jesus nian, moris hias núdar notisia ksolok ba ema hotu. Hanesan Maria Madalena no apostolo sira, HALAI ba fahe ba malu notisia rate mamuk. Ida ne’e mak ita nia knár mós. Resureisaun oferece ba ita naroman foun ida para ita bele kompriende Jesus nia mate. Tempo ne’ebé hanesan, lori komunidade kristaun transforma ba tempo esperansa ida. Ita nia fiar tenki lori ita mai to’o iha Domingo Resurreisaun. Ida ne’e mak sentro fiar ita sarani nian.
Papa Francisco dehan Paskoa mak festa bót liu sarani nian, nia bót liu festa natal. Ita fiar iha Jesus ne’ebé terus, mate no moris hias atu soi ita. Nia domin no fidelidade ba Aman nia projeto salvasaun hetan rekompensa husi nia Aman no ita nia Aman liu husi Moris Hias. Ita hotu ne’ebé sai oan sira iha Oan Mane-Mesak (somos filhos no Filho) bele mós manan grasa ida ne’e.
Basá, hanesan Maria Madalena ne’ebé iha domin bót ba Jesus tamba nia esperiensia Jesus nia perdaun no domin liu husi liberta nia husi nia sala sira, ita mós ho Jesus nia mate no moris hias, ita manan ona mós grasa ida ne’e. Ida ne’e mós mak ita nia fiar no esperansa iha tempo ohin loron iha esperiensia des-ordem no incerteza iha ita nia rain.
Husi meza Quinta-Feira Santa nian to’o mai rate mamuk Domingo Resurreisaun nian, ita kompriende katak ita nia fiar hatur-an iha Maromak ida ne’ebé dehan ho Lia-Fuan, hatudu ho hahalok no justifika ho vida rasik núdar prova konkreto ida ba misaun salvasaun nian.
Projeto salvasaun ne’e, projeto trinitário ida no ita hotu mesak deít beneficiario husi projeto refere. Nuné, mai ita ba uza ‘MINA MORIN/PERFUME’ Kristo Moris Hias nian hodi lao sai ba haklaken ‘Lia-Foun Diak’ Moris Hias nian ba maun-alin sira hanesan haktuir iha leitura dahuluk husi livro haktuir apostolo sira nia hahalok. Apsotolo sira HARÉ, FIAR no FO SASIN.
Ita mós ohin dader ne’e, transportados ba rate mamuk, ita haré, ita fiar no ita preciza haklaken. Ita nia knár atu lori notisia ksolok ne’e iha ita nia moris lor-loron nian, iha ne’ebé deit ita iha ba, ho konsciensia ida katak Vitoria certeza ida husi mate no odamatan moris hias nian loke ona ba ita-umanidade tomak. So nuné deit mak ita bele hananu ho Salmista: “Loron ida ne’e, Maromak fo tulun, mai hawelok haksolok”. Amen. Amdg!(lupersj)
(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)
1,170 total views, 3 views today
Bele hare Video Seluk :
Subscribe to Timorpost
