DILI (timorpost.com)—Autoridade Protesaun Sivíl (APC Sigla portugés) liu husi sentru nasionál operasaun Protesaun Sivíl (CNOPC, Sigla portugés) relata relatóriu kona ba dezastre natural iha territóriu laran durante semana ida ne’e hatudu uma-kain 94 mak afetadu.
Diretór Gabinete Relasaun Externa no Komunikasaun iha APC, Anacleto Caetano, hatete dadus hirak ne’e rekolla husi loron 05 to’o 11 fulan Dezembru 2023.
“Dezastre natural ne’ebé akontese durante semana ida ho tipu tolu hanesan ahi-han, anin sobu no rai halai, husi tipu tolu ne’e rejistu uma-kain xefe família hamutuk 94 afeta”. Nia haktuir asuntu ne’e ba jornalista sira iha edifísiu APC Kaikoli, Segunda (11/12).
Uma-kain 94 afetadu dezastre natural ne’e mai husi munisípiu Sanulu hanesan, Baukau hitu, Aileu 11, Ermera rua, Bobonaru ida, Likisá lima, Manufahi Ualu, Manatutu neen, Viqueque 47, Dili ida no RAEOA lima.
Agora parte Komandu APC munisípiu ho parseiru relevante fornese ona asisténsia emerjénsia ba família afetadu sira mak hanesan Ai-an no matéria (food item no non-food item).
Ekipa mós nafatin halo operasaun iha munisípiu sira hodi kontinua halo levantamentu detaillu kona ba sasán ne’ebé mak estragus no lakon.
606 total views, 3 views today
Bele hare Video Seluk :
Subscribe to Timorpost
