DILI (timorpost.com)—Sekretáriu Estadu Formasaun Profisionál Empregu (SEFOPE) iha ona planu Tinan 2024 sei servisu hamutuk ho governu Australia no Korea hodi hamenus liña traballadór ne’ebé halai sees husi sistema.
“Ita sei halo planu ida molok traballadór sira too iha Australia no Korea, sira nia pasaporte tenke rekolla tiha husi kompañia ou embaixada sira atu hamenus risku halai sees husi sistema”. dehan Sekretáriu Estadu Formasaun Profisionál Empregu (SEFOPE), Rogério Araújo Mendonça ba Jornalista sira iha Kaikoli, Kinta ( 30/11).
Rogério haktuir, bain-bain públiku sira sempre ko’alia traballadór sira iha nasaun Australia no Koreia barak mak ilegál ne’e la iha, maibé ida ne’e la’ós ilegál, maibé sira sees an husi sistema.
Ho ida ne’e maka SEFOPE iha planu sei rekolla traballadór sira nia pasaporte hodi evita la halai sees husi sistema refere.
“Atu evita traballadór sira la bele halai sees husi sistema, maka ita sei uza meius di’ak ida, ita nia traballadór sira iha 2024 kuandu sira atu ba karik, ita tenke rekolla hotu sira nian pasaporte tau hotu iha embaixada depois servisu hamutuk ho embaixada sira, hanesan Governu Australia atu fó de’it kartaun hanesan Billete identidade atu garante ita nian traballadór sira ne’e la bele sai husi sistema, ida ne’e mak ita sei halo iha 2024,” Nia haktuir.
Tuir dadus ne’ebé iha, traballadór sira ne’ebé halai husi sistema nee hamutuk 819 pesoás, tantu feto no mane, ida nee maka agora daudaun iha Australia inklui Koreia.
Bainhira traballadór sira halai sees husi Sistema ne’e kompañia sente lakon, tanba sira trata tiha imi nia viajen nian, maibé imi seidauk servisu too fulan ne’ebé mak termina imi halai sai ona, entaun kompañia sente nia lakon.
“Ida ne’e kostume erru ida bele taka dalan ba joven sira seluk-seluk ne’ebé mak hakarak ba servisu hanesan ho sira, sei la hetan oportunidade hanesan ita boot sira hetan”.
Hatán ba kondisaun traballadór sira ne’ebé hasees an husi sistema, Sekretáriu Estadu Formasaun Profisionál Empregu (SEFOPE), Rogério Araújo Mendonça hatete to’o agora la iha traballadór ida ne’ebé halai sees husi sistema ba keixa embaixada hakarak fila, tanba ida ne’e ita konsidera sira di’ak hela.
1,107 total views, 3 views today
Bele hare Video Seluk :
Subscribe to Timorpost
