DILI, (timorpost.com) — Diretór Jerál Servisu Rejistu Notariadu (DJSRN), João Fernando Martins Borges, husu sidadaun sira atu trata kaderneta pasaporte tuir ida-idak nia munisípiu. DJRSN halo atendimentu ba públiku no deteta katak sidadaun sira halo tratamentu barak mai husi munisípiu.
“Maske ita-nia sidadaun sira mai hotu iha ne’e, depois ita haree sira-nia dokumentu ami sei enkamina ba ida-idak nia munisípiu, tanba foin lalais ne’e ha’u fó hatene katak sei trata kaderneta pasaporte tuir ida-idak nia munisípiu, maibé na realidade sira mai konsentradu hotu iha nasionál, tanba ne’e ita husu ba sidadaun sira konsénsia atu trata tuir sira-nia munisípiu”, Diretór Jerál Servisu Rejistu Notariadu (DJSRN), João Fernando Martins Borges, informa ba jornalista sira ni servisu fatin, Bebora-Dili, Kuarta, (22/11/2023).
Nia hatutan, atendementu ba pasaporte kada loron atende de’it ema 140, tanba ne’e DJSRN uza maneira seluk maka halo desentralizasaun servisu iha munisípiu maibé notariadu mantein atende kada loron ema 140.
“Munisípiu sira hotu-hotu halo atedimentu hanesan ohin, Ohin ami dehan tiha ona sira ne’ebé mai husi munisípiu fila ba ida-idak nia munisípiu, iha ne’e ba iha munisípiu Dili de’it, atende pedidu ofisiál sira husi instituisaun relevante, husu tiha desentralizasaun servisu no ita desentraliza servisu ba iha munisípiu sira hotu halai fali mai iha nasionál, ida-ne’e mak ita problema,”nia hatete.
Diretór Notariadu kada munisípiu hetan ona orientasaun husi nasionál hahú ohin loron 22 fulan-Novembru tinan 2023 reativa ona atendimentu pasaporte ba públiku.
Durante ne’e, munisípiu ne’ebé atende pasaporte barak liu mak munisípiu Baukau no Bobonaro, maibé munisípiu seluk atendimentu menus hela, tanba ne’e husu sidadaun sira ida-idak fila ba munisípiu, trata kaderneta pasaporte iha ida-idak nia munisípiu.(*)
2,115 total views, 3 views today
Bele hare Video Seluk :
Subscribe to Timorpost
