Timorpost.com I MANUFAHI— Relasiona ho udan no anin boot ne’ebé akontese iha Sábadu kalan mais menus oras tuku 03 to’o segunda horisehik, iha aredores munisípiu Manufahi rezulta liña eletrisidade ba postu administrativu Alas no iha aldeia Fahi Luhan, suku Holarua, Postu Administrativu Same avaria.
Diretór Eletrisidade de Timor-Leste Empreza Públiku (EDTL-EP), munisípiu Manufahi, Julio Pacheco Pinheiro konfirma, udan ho anin maka’as horsehik lina eletrisidade iha postu administrativu Alas hetan estragu todan.
“Horsehik iha postu Alas liña eletrisidade hetan avaria todan tanba ai teka ida tohar iha Kakaon, suku Dotik nia leten halo fiu monu hotu ami hadi’a seidauk hotu”dehan Julio ba Timor post iha Same, Segunda (08/05).
Nia dehan, avaria iha postu Alas ekipa tékniku EDTL-EP hadi’a seidauk hotu ohin akontese tan iha Datina aldeia Fahi Luhan, suku Holarua ai Kakeu boot ida monu baku liña aat hotu.
“Fatin avaria iha Alas ho Fahi Luhan ohin ami labele hadi’a tanba ita nia klima mak la fó tempu ami hodi halo serbisu nune’e aban ami foin kontinua. Ne’e duni ba daudaun ne’e provizóriu iha Fahiluhan no postu Alas ahi sei mate hela enkuantu fatin seluk ahi moris normal hanesan baibain” dehan nia.
Molok hakotu nia dehan, avaria hirak ne’e ekipa tékniku susar atu hadi’a lalais tanba kondisaun klima mak la fó tempu. Udan hela de’it afeta besi namdoras no ekipa ta’uk rai lakan bainhira hadi’a ahi iha besi leten. Karik aban Tersa la udan ekipa sei tun ba hadi’a.(lcl).
5,388 total views, 6 views today
Bele hare Video Seluk :