DILI (timorpost.com) — Eis Ministra Solidariedade Sosiál no Inkluzaun (MSSI), Domingas ‘Mikato’ Alves, apresia órgaun ezekutivu hahú fó ona podér ba feto maluk sira, atu partisipa iha prosesu dezenvolvimentu sira iha rai laran.
Nia deklara hafoin sai oradora prinsipál ba semináriu nasionál ho tema “Hamutuk ho frente urbana ita tau lisuk hanoin ba polítika dezenvolvimentu nasionál, hodi lori moris di’ak ba povu”, ne’ebé organiza hosi Frente Urbana ho RYLA, realiza iha Salaun Lanine-Larigutu Komisaun Nasionál Eleisaun (CNE), Kolmera, Sesta (30/06).
“Ita nia Governu nia polítika maka envolve igualdade, empoderamentu, maibé ita nia Governu komesa fó ona podér ba feto”, nia apresia.
Nia rekoñese programa hotu-hotu inklui envolvimentu feto iha polítiku sira, oportunidade atu estuda, pelumenus envolve ona feto Timoroan ho porsentu 30 envolve iha lejizlativa no ezekutiva.
“Feto sira sempre tau ba atu hetan de’it eskola ka bolsa estudu mós ema sempre tau porsentu 30 pelumenus feto, ne’e maka feto sira barak ba Australia, sira ba eskola iha li’ur Governu sempre konsidera”, nia hateten.
Maski feto iha diferente respeitu, maibé moris nu’udar sosiedade feto sira tenke halo buat ruma, saida maka feto halo mane mós tenke halo, saida maka mane halo feto mós esforsu tenke halo hanesan ho mane sira.
“Ita nia sosiedade laran ne’e ita bele halo, saida maka feto halo, saida maka mane halo, feto mós bele halo”, nia promete.
Haree husi sistema patriarkál, feto sei todan tebes atu kontribui ba prosesu tomak iha nasaun ida ne’e, maski inan-feton ida kesi ho responsabilidade iha uma laran, maibé la kesi ninia direitu hanesan feto, atu partisipa iha dezenvolvimentu nasionál.
“Importante feto maka ida ne’e, hatene o nia direitu, hatene aprende iha eskola no servisu, ne’e direitu feto nian atu partisipa iha prosesu dezenvolvimentu sira iha rai laran”, nia esplika.
Nia konta, esperiénsia lubuk ida hatudu momoos katak, feto nia partisipasaun iha Instituisaun Estadu sira hanesan PNTL, F-FDTL, sai membru parlamentár no Governu hatudu momoos emantisipasaun feto maka’as iha prosesu dezenvolvimentu nasaun ida ne’e nian.
“Ita nia planu feto nia partisipasaun iha dezenvolvimentu mós ita tenke kontribui mós, agora ita haree objetivu dezenvolvimentu sustentavel ita tenke kontribui ba ida ne’e”, nia husu.
Tanba ne’e maka feto nia partisipasaun iha Instituisaun Estadu no órgaun Estadu sira, hatuur ona empoderamentu feto, nune’e feto nia direitu, ema ho deferénsia nia direitu, tanba ne’e maka harii Sekretaria Estadu Promosaun Igualdade no Inkluzaun, ne’ebé programa hotu-hotu integra iha laran.
1,602 total views, 3 views today
Bele hare Video Seluk :
Subscribe to Timorpost
