DILI (timorpost.com)-Polisia Nasionál Timor-Leste (PNTL), liuhusi Komandu Munisípiu Likisá, detein sidadaun mane ida ho insia C, ne’ebé mai hosi Atambua Indonézia, tenta tuir votasaun.
Komandante PNTL Munisípiu Likisá, Superintendente Polisia, Umbelina Soares, informa sidadaun ne’e polisia asegura iha área Sentru Votasaun Darulete, Postu Administrativu Likisá, Munisipiu Likisá.
Sidadaun ne’e autoridade seguransa detein hafoin hetan keixa hosi autoridade no komunidade sira ne’ebé lamenta, tanba sidadaun refere hela iha Atambua Indonézia no tinan kotuk iha eleisaun prezidensiál mai tuir votasaun, depois fila fali ba hela iha Indonézia.
“Polisia detein, tanba tuir informasaun katak, dadersan povu sira ba formatura atu tuir votasaun, nune’e komunidade Darulete koñese hela sidadaun ne’e, katak nia mai hosi Atambua uluk mai tuir votasaun fila tiha ba Atambua, depois nia mai atu tuir votasaun tan,” nia informa via telefone, Domingu (21/05/2023).
Nia hatutan, “Sidadaun ne’e atu vota ba partidu ida ne’ebé ita la hatene, tanba ne’e mak povu halo reasaun hodi polisia no fiskais sira ba asegura tiha hodi halo investigasaun”.
Nia dehan, Komandu PNTL Likisá halo ona investigasaun hodi haree, karik ema ne’e komete krime eleitorál, sei prosesa tuir lei. Maibé daudaun ne’e sei hein prosesu investigasaun klean ne’ebé entrega ona ba Komandu Jerál PNTL.
“Ita sei halo hela prosesu investigasaun klean hodi haree, karik komete krime eleitoràl ka lae, tanba sei iha hela investigasaun,” nia hateten.
Dadaun ne’e, Komandu Polisia Likisá entrega kedas sidadaun refere ba Polisia Nasionál Servisu Investigasaun Kriminál (PNSIK) Komandu Jerál PNTL.
9,828 total views, 6 views today
Bele hare Video Seluk :