Dili(timorpost.com)—Kado ai matan dukur hun boot ne’ebé mak taka metin ba kalén leten eskola Ensinu Sekundáriu Jerál 10 Dezembru nian mak ai ne’ebé tohar tun baku iha eis Diretór Eskola ESJ, Domingos Savio nian tilun hun to’o rahun no lori to’o Hospital Nasionál Guido Valadares (HNGV) matebian hakotu iis, tuku 9 liu, Sesta (19/05/2023).
“Matebian telefone hw tun mai haree tesi ai, ne’e mak ha’u tun mai ha’u hamriik iha ne’e matebian tun mai bolu dehan ita ba dada ona, entaun ha’u kaer tali nia rohan, ne’ebé ami dada primeiru ai ne’e book-an mai, entaun dada segundu ai ne’e mai uma ne’e ami hotu husi, matebian la husik entaun ai ne’e todan hit matebian ne’e sa’e ba to’o klaran baku loos iha matebian nia tilun hun, matebian monu tun ran fakar barak no lori to’o Hospital Nasionál Guido Valadares matebian hakotu iis”, dehan Gabinete Apoiu Tékniku (GAT) Eskola ESJ 10 Dezembru, Vasco Hornai, ba Timor Post iha ESJ 10 Dezembru, Sesta (19/05/2023) .
Vasco esplika, nia atu ba vizita Komandante Sarai mate iha Metinaru, matebian telefone tun mai haree ema tesi ai, lahatene se mak bolu ema sira ne’e ba tesi ai, matebian mak bolu ka lahatene.
“Tuir loloos tesi ai hanesan ne’e ha’u tenke hatene, maibé ida ne’e ha’u lahatene, ohin dadeer matebian telefone ha’u mai haree ema tesi ai, entaun ha’u mós tun mai hamriik iha ne’e rona sensor ne’e lian, lakleur matebian ne’e tun mai dehan ita ba dada ona, ne’ebé ha’u tuir ba kaer tiha tali, ha’u haree ai boot tali ne’e aat”, nia haktuir.
GAT hatete, tuir nia rona dehan ema tesi ai ne’e selu, maibé tuir loloos tesi ai sira hanesan ne’e GAT eskola mak tenke selu, tanba iha eskola ne’ebá iha projetu komunitáriu entaun sira mak tesi, tanba matebian mak prezidente.
“Ne’ebé ha’u hanoin planu komunitariu ninian ne’e mak ha’u mai hamriik hodi tesi no selu halo nusa ne’e ha’u lahatene”, nia haktuir.
Matebian Orijen hosi suku Maluru, Postu Administratiu Kelikai, Munisipiu Baukau.
Ema na’in-tolu ne’ebé mak ba na’in-rua dada no na’in-ida kado ai ne’e, halai lakon tiha no polisia mós to’o agora seidauk ba iha fatin akontesimentu iha eskola Ensinu Sekundária Jerál 10 Dezembru.
Mate isin oras ne’e sei iha hela Mortuária Hospital Nasionál Guido Valadares.
1,958 total views, 3 views today
Bele hare Video Seluk :
Subscribe to Timorpost
