DILI, (timorpost.com) — Ministériu Justisa (MJ) liuhosi Diretór Jerál Servisu Rejistu Notariadu (DJSRN), João Fernandes Martins Borges, informa kaderneta pasaporte hamutuk 20.650 to’o ona iha Timor-Leste, maibé sei hein lansamentu hafoin halo atendimentu ba públiku liuhosi sistema online.
Nia informa, públiku rona ona informasaun husi Ministru Justisa katak kaderneta pasaporte sei to’o, tanba ne’e pasaporte to’o horseik, kaderneta hamutuk 20.650 ho ida-ne’e parte notariadu sei organiza hela para hakat ba atendementu liuhosi ajendamentu online.
“Ita seidauk bele halo atendementu, ita seidauk loke atendimentu ba públika tanba sei hein lansamentu ba sistema online, depois ita halo atendimentu ba públiku,” dehan Diretór Jerál Servisu Rejistu Notariadu (DJSRN), João Fernandes Martins Borges, ba jornalista sira iha nia kna’ar fatin, DJSRN-Bebora, Tersa, (16/01)
Nai esplika, “Notariadu sei fó tan atendimentu públiku bele aplika online husi uma la presiza mai forma, hanesan imi jornalista sira kestiona beibeik, komunidade no sidadaun rekerente sira bele aplika asesu mai liuhosi sistema online para tékniku sira prepara, maibé sei hein lansamentu públiku mak bele asesu”.
Nia hatutan, sidadaun sira ne’ebé halo tratamentu ba pasaporte liuhosi sistema online la presiza forma ona maibé aplika de’it husi uma. Bainhira sidadaun sira iha nesesidade atu trata pasaporte presiza aplika ba pasaporte, trata ba bilete identidiade aplika ba iha BI nian, no mós rejistu kriminál no inklui sertidaun nasiomentu.
“Iha modolu haat mak ita adianta uluk, ita haree katak servisu husi parte ida ne’ebé mak rekerente barak entaun ita uza uluk ida-ne’e. Primériu ita hahú uluk iha munisípiu Dili, maibé nunisípiu sira seluk haree ba nia andamentu hafoin ita halo atendimentu online ba sira, ita-nia nafatin simu ema 140 kada loron, ema ne’ebé aplika husi númeru 1 to’o 70, ne’e mai tempu dader, 71 to’o mai 140 sei mai tempu lokraik,” dehan nia.
Bainhira ema trata pasaporte liuhosi sistema online mak priense ona númeru ne’ebé iha automátikamente sistema sei taka-an, no sira ne’ebé aplika sei muda ba loron tuir mai. Pasaporte daudauk ne’e iha ona notariadu, horseik (15/01) to’o Timor iha tuku 02:00 lorokraik.
Sistema online ba pasaporte ne’e, Ministériu Justisa sei aplika faziadamente, hahú servisu sentrál, pasaporte komum signifika katak atende ba ema hotu, maibé nafatin hein lansamentu sistema online, tuir orientasaun husi Ministériu Justisa para bele evita ema labele forma nafatin iha notariadu.
Diretór esplika, muda formatura ba sistema online, maibé pagamentu nafatin hanesan baibain no tuir tempu ne’ebé sidadaun sira presiza, urjente $100 USD, $75 USD no $50USD, atendimentu ba públiku mak la forma ona sei loke sistema online.(*)
3,108 total views, 6 views today
Bele hare Video Seluk :
Subscribe to Timorpost
