Dili (timorpost.com) – Ministra Negósiu Estranjeiru no Kooperasaun, Adaljiza Magno, sei hala’o vizita traballu ba Estadus Unidus Amérika (EUA), hodi partisipa iha Asembleia Jerál Nasoins Unidas ba dala-77, iha Nova-Iorke.
Tuir Komunikadu imprensa ne’ebe Timor Post online asesu iha loron 14 Fulan Setembru tinan 2022, katak molok partisipa iha UNGA-77, hahú loron 15 to’o 17 Setembru tinan ne’e, Ministra Adaljiza Magno no delegasaun sei halo vizita uluk ba sidade Washington, DC, Kapitál EUA.
Iha oportunidade ne’e, Xefe diplomasia timoroan sei marka enkontru ho entidade importante-sira hanesan Vise-Sekretaria Estadu EUA, reprezentante ekipa Millennium Challenge Corporation Espesialista Negosiadór ba Asuntus Realokasaun no sei hasoru malu mós ho ekipa Administradór-USAID.
Tuir mai, iha loron 18 to’o 25 Setembru 2022, iha sidade Nova-Iorke EUA, Ministra sei partisipa iha sesaun abertura ba Debate Jerál UNGA-77, iha fatin hanesan, sei partisipa iha enkontru altu nivel liga ho asuntu Direitu Úmanus nian.
Ministra Magno, mós sei kontinua halo enkontru Bilaterál ho Vise-Primeiru Ministru Slovenia no mós entidades altu nível sira; alende konvoka mós enkontru ba asuntu Mulitilateral no Bilaterál sira seluk durante estadia iha sidade Nova-Iorke.
Ekipa Diresaun Jerál ba Asuntu Multilateral no Rejionál-MNEK sei akompaña vizita traballu Ministra Magno nian iha EUA.
Hafoin ramata vizita traballu iha Estadus Unidus Amérika, Ministra no ekipa-MNEK sei kontinua halo vizita traballu ba Japaun.
2,317 total views, 3 views today
Bele hare Video Seluk :
Subscribe to Timorpost
