Dili(timorpost.com)—Estadus Unidus Amérika (EUA), liuhosi United Nations Development Program (USAID), asina akordu ho Governu Timor-Leste atu apoia osan millaun 18 USD hodi promove rekuperasaun ekonomia.
Enkaregadu Negósiu Estadus Unidus iha Timor-Leste, Thomas Daley, hatete, valor orsamentu millaun 18 USD atu oferese ba inisiativa foun dezenvolvimentu ne’ebé dezeña atu reforsa setór la’ós petrolíferu iha Timor-Leste.
“Estadus Unidus iha kompromisu atu hametin ami nia parseira ho Timor-Leste iha tempu ne’ebé ita servisu hamutuk, hodi promove rekuperasaun ekonomia, pos-pandemia no ekonomia Timor-Leste nian, ida ne’ebé diversifika liu no inkluzivu”, Timor Post sita komunikadu imprensa, Sesta (19/05/2023).
Apoiu ne’e hanesan faze daruak husi fundu ne’ebé prevee ona orsamentu ida ho valor millaun 92,3 USD liuhosi akordu objetivu dezenvolvimentu (DOAG), nu’udár parte ida hosi USAID ninia estratéjia kooperasaun ba dezenvolvimentu nasaun ba tinan lima nian, ne’ebé to’o Dezembru 2025.
Ministru Finansas (MF) Timor-Leste, Rui Augusto Gomes ho Diretora Misaun USAID, Zema Semunegus, maka asina ona akordu ne’ebé pasu importante hodi avansa ba dezenvolvimentu Timor-Leste.
Entretantu, USAID ne’ebé servisu hamutuk ho Governu Timor-Leste hodi apoiu dezenvolvimentu ne’ebé mak inkluzivu no efetivu. Hahú hosi 2001 USAID oferese ona liu millaun 323 USD atu tulun Timor-Leste ninia dezenvolvimentu.
Apoiu ne’e atu esforsu hodi harii nasaun ida ne’ebé prósperu, saudavel no demokrátiku liuhosi programa promove kresimentu ekonómiku, espesialmente ba setór agrikultura, hadi’a saúde Timoroan nian partikularmente ba feto no labarik.
471 total views, 12 views today
