Dili (timorpost.com) – Atu sustenta nesesidade família, Inan feto, Eugenia deside toba iha estrada ninin hodi fan sasán.
Negosiante ne’e hatete, iha estrada ninin, maski rai-rahun barak no anin boot, maibé tenke pasiensia hodi fan sasán iha estrada públika.
“Ha’u lor-loron halo negosiu hahú husi dadersan tuku 7:00, to’o kalan mós ha’u ho oan toba iha ne’e de’it, tanba ita la buka osan mós ladi’ak, tanba nesesidade uma laran maka ita tenke obriga aan hodi mai faan sasán iha estrada ninin”, nia hateten ba Timor Post online iha Area Tasi-Tolu, Domingu (23/10).
Nia hatutan, buka osan ba nia kabun no lia moris no lia mate, tanba ne’e lor-loron tuur hanesan de’it mós tenke pasiensia.
“Ami fan sasán iha uitoan ne’e ema la mai sosa mós ami nafatin hakmatek iha ne’e, loron ida ami hetan de’it 4 USD lae 3 USD de’it”, nia dehan.
Portantu Negosiante orijen hosi Munisípiu Ermera ne’e haktuir, uluk sira sei fan iha Terminál ema ba sosa, maibé Governu liuhusi Autoridade munisípiu Dili, muda tiha sira ba tasi ibun iha loron 16 Fulan Maiu tinan ida, sira haree ema la ba sosa sira-nia sasán, entaun sira deside fan fali iha estrada ninin ne’e to’o ohin loron.
“Ami fan sasán iha estrada ninin ema ladún mai hola ami-nia sasán mós, ami labaruk no la rende hodi hapara ami-nia negosiu ne’e, maibé buat hot-hotu ami halo ho pasiensia de’it,” nia haktuir.
Ikus nia dehan, osan sira ne’ebé nia hetan husi fan sasán ne’e sustenta nesesidade família uma laran no nia prezisa lor-loron.
1,859 total views, 3 views today
Bele hare Video Seluk :
Subscribe to Timorpost
