ADVERTISEMENT

Durante Tinan 10, Telkomcel Iha Ona Povu Timor-Leste Nia Fuan

Mario da Costa - Ekonomia · Internasional
Reportajen : Editór Orlando Oki
  • Share
Caption: Funsionáriu Telkomcel iha Timor-Leste selebra aniversáriu Telkomcel nian ba dala 10 iha Timor Plaza. Foto FB Telkomcel

DILI (timorpost.com) – Mudansa era globalizasaun ne’ebé adapta hosi mundu teknolojia konsege fó impaktu pozitivu ba rai Lafaek Timor-Leste liuhosi prezensa telekomunikasaun sira, ida mak operadór Telkomcel.

Telkomcel mosu iha rai Lafaek ne’e ho lema ida katak, “Servi Ho Domin”, ho ninia símbolu ida ke reprezenta kór favoritu mak kór mean (Warna Merah), ne’ebé nakonu ho ninia signifikativu.

ADVERTISEMENT
SCROLL FILA BA NOTISIA

Kór mean ne’e bainhira haree hosi ókulu filozofia kór nian, ne’e hatudu katak, Konfiansa, Pensamentu kriativu, Alegria no Forsa, Risku no Podér, Paixaun no Hadomi, Ambisaun no Korajen, Kalorozu no Beleza.

Maibé signifika hosi kór mean ne’e bainhira haree hosi aspetu psikolojia nian katak, utiliza kór mean atu atrai ema iha mundu negósiu nian, nune’e Telkomcel uza kór mean ne’e iha ninia importánsia rasik.

La’ós ne’e de’it, maibé Telkomcel mós mai ho vizaun no misaun rasik katak, telekomunikasaun ne’e hakarak fasilita no suporta povu Timor-Leste ho fuan no domin hodi bele asesu ba iha liña internet atu nune’e povu bele hatene kle’an no koñese di’ak liu tan informasaun sira ne’ebé mak akontese iha planeta mundu ida ne’e nian.

Hosi buat hirak ne’e, enkoraja tebes empreza PT Telekomunikasi Indonesia Internasionál (Telin), hanesan empreza Telekomunikasaun Indonézia (Telkom) nian ida ho ninia produtu rasik mak “Telekomunikasaun Seluler” ne’ebé ho naran koñesidu mak “Telkomcel”, hodi dere odamatan Timor-Leste nian tama mai, tanba Governu mak loke oportunidade liu hosi lisensa telekomunikasaun nian. Nune’e operadór Telkomcel ne’e legaliza ninia operasaun iha rai Lafaek Timor-Leste iha loron Kinta, 17 fulan Janeiru tinan 2013.

Maibé, Telkomcel estabelesidu iha Timor-Leste, iha loron 17 fulan Setembru 2012, hafoin hetan lisensa “Spektrum Radio” hosi Governu Timor-Leste iha loron 22 fulan Outubru tinan 2012 hodi garante ninia servisu ba povu Timor tomak ho rede internet 3G (third generation technology).

Telekomunikasaun Seluler ne’e fofoun harii ho ninia kapitál rasik, ho montante orsamentu hamutuk millaun 50 USD, ne’e kustu internal nian hodi harii infraestrutura 2G no 3G Telkomcel nian iha territóriu Timor laran tomak.

Telkomcel ninia servisu ba povu Timor-Leste tomak ne’e mak liu hosi xamada telefone (voice), servisu mensajen badak (Short Message Service: SMS), data (internet), valor servisu agregadu (value added service: VAS) no servisu espesiál ba korporativu.

Prezensa Telkomcel iha momentu tinan 2012 ne’e, mai ho otimista ida hodi fó ninia tarjetu katak, operadór telekomunikasaun ne’e sei hetan kliente rihun 600 (600.000) ou porsentu 60 (60%) hosi total populasaun iha Timor-Leste.

Aleinde ne’e, operadór Telkomcel la’ós hala’o de’it atividade komérsiu iha setór telekomunikasaun nian iha Timor-Leste, maibé promove mós rekursu umanu Timor oan lubuk ida hodi bele assume kargu importante balun ne’ebé reprezenta nasaun sira iha ASEAN (Association of South the East Asian Nations).

Rekursu umanu Timor oan ida ne’ebé mak sai the best mak señora Sesaltina Jannet da Rosa Maia, nu’udar Manager Billing, Collection & Corporate Communication, hanesan ema númeru rua (2) iha ASEAN no Australia.

Tanba ne’e, jornada operadór Telkomcel nian iha Timor-Leste hahú hosi tinan 2012 to’o 2022 ne’e tama ona ba idade joven nian, ne’ebé mak iha ona hanoin ida ke luan para oinsá bele hakat ba oin, no mai ho espíritu ida katak hakarak servi ema hotu-hotu ho domin.

Durante tinan 10 nia laran, operadór Telkomcel mai ho lema sira ne’ebé mak uza hanesan iha tinan 2012, 2013 no 2014, Telkomcel hamriik ho lema ida katak, “Dezenvolve Timor-Leste”.

Enkuantu, iha tinan 2015, 2016 no 2017, Telcomcel muda ninia lema katak, “Fantástiku”, depois tama iha tinan 2018, 2019 no 2020 muda fali lema ne’e ba “Exelente (Magnificient)”.

No iha tinan kotuk 2021 Telkomcel hili fali lema ida katak, “Forte Liu (Stronger)”, maibé iha loron aniversáriu ba tinan 2022 ne’e, hatuur fali lema ida ne’ebé mak kapás tebes katak, “Servi Ho Domin”.

Hosi lema hirak ne’e enkoraja tebes operadór Telkomcel rasik, hodi hametin di’ak liu tan familiaridade ho povu Timor-Leste liuliu mak kliente sira liu hosi atendimentu servisu no produtu Telkomcel nian ne’ebé mak utiliza iha atividade telekomunikasaun nian.

Lee Mós:
Konsellu Ministru Aprova Trasporte Públika Bele Tama Sai Fronteira ho Indonézia

Entretantu, to’o iha aniversáriu ba dala 10 iha tinan ida ne’e nian, operadór Telkomcel konsege harii ona torre (tower) kuaze hamutuk 200 resin iha territóriu laran tomak inklui mós Rejiaun Administrativa Espesiál Oe-cusse Ambeno (RAEOA).

Bainhira estabelese torre (tower) sira ne’e iha munisípiu sira hotu, jeralmente so porsentu 10 (10%) mak iha problema kona-ba rai, relasiona ho propriedade da terra (kepemilikan tanah), maibé tanba iha realizasaun ba abordajen ne’e Telekomcel sempre hamutuk ho Governu no autoridade lokál sira tau atensaun ba iha prosesu sira ne’e no konsege solusiona ho di’ak.

Tanba ne’e, iha aniversáriu Telkomcel ba dala 10, ne’e hanesan motivasaun ida ne’ebé mak nakonu ho orgullu, tanba bele hakat liu ona situasaun sira ne’ebé difisil teb-tebes liuliu iha situasaun Pandemia Covid-19, ne’ebé halo ema hotu iha mundu ne’e pániku no trauma durante tinan rua nia laran, maibé ho grasa Maromak nian kompañia telekomunikasaun ne’e bele hamutuk fila fali ho família boot Telkomcel nian iha selebrasaun konfraternizasaun ba tinan ida ne’e nian.

Iha ámbitu selebrasaun Telkomcel ba dala 10 ne’e, Chief Executive Officer Telkomcel, Benedictus Ardiyanto Priyo, hatete, ba oin operadór Telkomcel sei hadi’a di’ak liu tan ninia infraestrutura sira iha territóriu laran tomak no mós produtu no ninia rede internet rasik.

“Ami sei hadi’a di’ak liu tan infraestrutura, produtu no ami nia servisu ne’ebé mak ami halo hodi moderniza atu oinsá ami bele servi kliente sira ho di’ak hosi parte produtu no mós rede internet nian”, CEO, Benedictus Ardiyanto Priyo, hateten iha aniversáriu Telkomcel ba dala 10 iha Timor Plaza, Sábadu, 17 fulan Setembru tinan 2022.

Tuir dirijente operadór Telkomcel iha Timor-Leste, servisu hodi servi ba públiku ne’e sempre enfrenta preokupasaun, kritika no sujestaun ne’ebé mak mai hosi públiku, maibé ida ne’e sai hanesan evaluasaun ida para bele dezenvolve di’ak liu tan telekomunikasaun ida ne’e nian.

Preokupasaun sira ne’ebé mak mai hosi kliente sira ne’e sempre fó korajen ba Telkomcel hodi solusiona kedas iha terenu, tanba ne’e Telkomcel ninia servisu durante ne’e iha koneksaun di’ak ho kliente sira.

Operadór Telkomcel durante tinan 10 iha Timor-Leste, konsege dezenvolve an ona ho di’ak, tanba to’o ohin loron ninia kliente sira barak ona no Telkomcel mós harii ona torre iha munisípiu sira hotu, hahú hosi illa Jaco (Lospalos) tama to’o rai ketan Oe-cusse (Citrana).

Aleinde ne’e mós, operadór Telkomcel oferese internet gratuita ba estudante sira iha eskola sira tantu iha kapitál Dili no mós munisípiu sira, liuliu mak Universidade Nasionál Timor Lorosa’e (UNTL), Universidade da Paz (UNPAZ) no eskola sira seluk inklui mós eskola sekundáriu Koléjiu Maliana nian iha munisípiu Bobonaro.

Caption: Progresu Telkomcel iha Timor-Leste. Foto FB Telkomcel

Operadór Telkomcel hakarak oferese internet gratuita ba estudante sira, tanba estudante sira ninia presiza ne’e barak tebes liuliu mak oinsá atu ba iha internet, atu nune’e sira bele utiliza meius oi-oin hodi bele estuda.

Internet ne’ebé mak Telkomcel oferese ne’e ninia objetu atu estudante sira iha rai Lafaek Timor-Leste, bele uza internet ho saudavel iha sira ninia nivel estudu mundu teknolojia nian.

Aleinde ne’e mós, Telkomcel iha programa sosiál, prinsipalmente durante iha situasaun Pandemia Covid-19 halo doasaun hodi oferese ajuda ba komunidade sira iha territóriu laran tomak liuliu iha kapitál Dili.

Iha parte seluk, operadór Telkomcel iha ninia kompromisu ida katak, sei suporta Estadu Timor-Leste hodi bele promove setór turizmu no mós Kafé Timor nian ba nasaun sira seluk iha mundu.

Tanba ne’e, iha loron 22 fulan Juñu 2022, Vice Prezidente Finansa & Rekursu Umanu Telkomcel, Dedi Edward Ambarita, hatete, operadór Telkomcel sei apoia Estadu Timor-Leste hodi bele promove setór turizmu no Kafé Timor ba iha rai li’ur.

ADVERTISEMENT

Maski nune’e, Telkomcel sei iha difikuldade balun ne’ebé mak durante ne’e hasoru mak preokupasaun kliente sira nian kona-ba rede internet, maibé haree hosi utilizasaun internet ne’e boot no barak liu, entaun ida ne’e halo Telkomcel oinsá atu oferese internet gratuita, tanba ida ne’e importante tebes.

Tanba povu Timor-Leste asesu ba internet ne’e la’ós de’it ba Live Streaming no atu haree de’it informasaun sira iha rai laran, maibé povu presiza uza internet hodi bele asesu mós ba iha informasaun hosi nasaun sira seluk liu hosi Twitter, Facebook, YouTube no mós rede sosiál sira seluk.

Lee Mós:
Timor-Leste Sai Membru ASEAN, Presiza Reforsa Ekonomia Rai Laran

Ida ne’e mak oportunidade ba Telkomcel hodi haree nune’e bele hadi’a, tanba ninia di’ak ne’e ba ita nia an rasik, tanba ita atu hetan rede internet ho di’ak mós parte ida presiza ahi eletrisidade liuliu iha fatin izoladu sira ne’e susar tebes, maibé durante ne’e Telkomcel mós uza ninia meius rasik ida mak Solar Sell.

Parte seluk mós, bainhira atu estabelese operadór telekomunikasaun ba komunidade ninia leet ne’e kestaun ida mós presiza tau atensaun liuliu mak kondisaun area sira ne’ebé estrema, tanba Timor-Leste ne’e iha foho barak, entaun dala ruma mós bele fó impaktu ba rede internet ne’e rasik.

Tanba ne’e, ho aniversáriu Telkomcel ba dala 10 ne’e hanesan orgullu boot ida, nune’e bele kontinua nafatin servi povu Timor-Leste ho fuan no domin hodi bele asesu ba iha informasaun sira iha mundu ida ne’e liu hosi teknolojia modernu nian.

Nune’e mós, iha aniversáriu Telkomcel ba tinan ida ne’e nian, kliente barak mak hato’o sira ninia apresiasaun no parabéns ho orgullu, tanba durante ne’e uza produtu Telkomcel sente iha ninia vantajen rasik.

Maibé iha parte seluk, kliente balun hato’o mós sira ninia lamentasaun no preokupasaun kona-ba atendimentu servisu no rede internet Telkomcel nian ne’ebé mak seidauk bele halo kliente sira satisfás.

Orgullu: Parabéns Ba Telkomcel

Caption: Kliente Telkomcel, Ana Paula Ferreira

Reprezentante kliente Telkomcel hosi munisípiu Vikeke, Ana Paula Ferreira, hatete nia parte hato’o parabéns ba aniversáriu Telkomcel ba dala 10, tanba kliente ne’e hanesan estudante ida ne’ebé mak durante ne’e uza kartaun estudante hodi asesu ba iha liña internet ho gratuita.

“Parabéns Telkomcel ba tinan 10 eziste iha Timor-Leste, I love You so Much, hosi Vikeke ami asesu ba kartaun estudante ho di’ak. Obrigadu ba manajemen Telkomcel ne’ebé sei kontinua harii tore iha suku no aldeia sira, Maromak akompaña staff no kliente tomak Telkomcel nian. Ba sira ne’ebé seidauk uza karik mai ona troka imi nia kartaun”, haktuir estudante Ana Paula Ferreira, hodi espresa ninia orgullu atu parabeniza ba loron aniversáriu Telkomcel nian.

Entretantu, kliente Telkomcel Tomas do Rego, haktuir, iha aniversáriu Telkomcel ba dala 10 ne’e bele hadi’a di’ak liu tan liuliu mak kria netik aplikasaun ida atu bele asesu ba video sira.

“Parabéns família boot Telkomcel, ba oin bele iha mudansa hodi halo netik aplikasaun nonton video hanesan Telemor nian. Parabéns Telkomcel ami nafatin suporta”, nia hateten tan.

Iha sorin seluk, Juvenal Venâncio, hanesan mós kliente Telkomcel hosi munisípiu Dili, hatete nia parte hodi hato’o parabéns ba Telkomcel ba loron aniversáriu ba dala 10 iha Timor-Leste.

“Parabéns ba Telkomcel ba loron aniversáriu dala 10 nian iha Timor-Leste”, Kliente Juvenal Venâncio afirma liu tan.

Governu Apresia Telkomcel

Iha parte seluk, Governu liu hosi Ministériu Turizmu Komérsiu no Indústria (MTKI), apresia ba telekomunikasaun Telkomcel ne’ebé mak hamosu aplikasaun teknolojia dijitál My Loja (T-PAY) iha Timor-Leste hodi bele ajuda kliente sira atu halo negósiu.

Caption: Telkomcel promove teknolojia dijitál T-PAY. Foto FB Telkomcel

“Ha’u fó parabéns no apresiasaun ba Telkomcel, tanba lori aplikasaun My Loja ida ne’e mai iha Timor hodi hamosu aplikasaun ida inovasaun mai komunidade Timorense, ne’e sei fasilita tebes ita nia modo na’in sira iha rai klaran, ita nia fatin turizmu hothotu, iha parte indústria ninian, indústria pequena, media no empreza sira”, Ministru Turizmu Komérsiu no Indústria, Jose Lucas do Carmo, hateten ba jornalista sira iha Suai Room Timor Plaza, Kuarta, 01 fulan Dezembru tinan 2021.

Tanba ne’e, Governu liu hosi Ministériu Turizmu Komérsiu no Indústria promete katak, iha futuru Governu Timor-Leste sei tau hanoin hamutuk ho kompañia Telkomcel nune’e bele apoiu populasaun iha setór telekomunikasaun nian.

Governante ne’e mós husu ba operadór Telkomcel atu kontinua koopera no komunika nafatin ho Ministériu Turizmu Komérsiu no Indústria, tanba ministériu ne’e iha diresaun ida ne’ebé mak toma konta ba protesaun konsumidór.

Sujestaun: Hadi’a Rede Internet

Mateus Monteiro, nu’udar kliente Telkomcel hosi Rejiaun Administrativa Espesiál Oe-cusse Ambeno (RAEOA), hatete nia parte hakarak sujere ba operador Telkomcel katak, ba futuru presiza hadi’a rede (jaringan) ne’e hodi di’ak hanesan uluk tama mai rai laran ne’e.

Lee Mós:
Televizaun ABC Hakarak Apóiu Média Iha Timor-Leste

“Sebele halo jaringan ne’e para di’ak fali hanesan uluk Telkomcel tama fofoun iha Timor-Leste”, kliente Mateus Monteiro hateten.

Nune’e mós, kliente Telkomcel Estanislau da Costa, hosi munisípiu Manufahi haktuir, kompañia Telkomcel presiza tau atensaun ba iha liña internet ne’ebé mak la’o seidauk di’ak.

“To’o tinan sanulu ona maibé liña internet mak seidauk di’ak, espera Telkomcel sei hadi’a ida ne’e iha futuru”.

Kliente Telkomcel, Leo Faria

Iha fatin seluk, Leo Faria, hanesan mós kliente Telkomcel hosi munisípiu Lautem hatete, operadór Telkomcel ninia rede ne’e uluk kapás tebes maibé agora daudaun ne’e komesa to’os fali, entaun ida ne’e mak sai problema boot.

“Telkomcel uluk jaringan kapás, ikus-ikus ne’e komesa to’os uitoan fali ona. Dala ruma ita enxe pulsa hotu ba la konek ida. Ita sei buka fali fatin mak foin bele. No dala ruma ita enxe tiha pulsa, rezultadu mak kode tidak valid ne’e mak problema boot”, Leo Faria afirma tan.

Hosi problema hirak ne’e, Chief Executive Officer Telkomcel, Benedictus Ardiyanto Priyo, hakarak esklarese ba kliente sira katak, problema sira ne’e, Telkomcel entende muito bem kona-ba reklamasaun sira ne’ebé relasiona ho rede internet ne’e tanba daudaun ne’e iha hela prosesu ba modernizasaun, maibé operadór Telkomcel sempre fó indemnizasaun ka kompensasaun ba perturbasaun sira ne’ebé mak akontese ba kliente sira.

Mudansa Dijitál Iha Telkomcel

Kompañia Telkomcel halo lansamentu hodi troka karteira manual ba karteira dijitál atu bele fasilita kliente sira ho di’ak liu tan kona-ba transferénsia osan ka sasán online ruma.

Ho ida ne’e mak Telkomcel iha misaun ida atu sai hanesan liurai dijitál (King of Digital) atu bele suporta komunidade sira ne’ebé mak seidauk sente rendimentu finansiál.

Caption: Mudansa dijitál iha Telkomcel. Foto FB Telkomcel

“Liu hosi relatóriu ita nia Banku Sentrál Timor-Leste katak ita nia povu barak seidauk hatene saida mak rendimentu finansiál, tan ne’e ami iha misaun ida atu sai King of Digital atu bele ajuda ema sira ne’ebé hakarak transfere osan ka sasán online iha toko online sira”, Manager/Jerente, Billing, Collection & Corporate Communication, Sesaltina Jannet da Rosa Maia, hateten iha Timor Plaza, Sesta, 28 fulan Agostu tinan 2020.

Tuir dadus ne’ebé mak iha katak, operadór Telkomcel iha Timor-Leste daudaun ne’e okupa ona kliente hamutuk rihun 300 (35%) hosi total populasaun millaun 1.2 iha Timor-Leste.

To’o ohin loron Telkomcel fó servisu ba sidadaun Timor oan kuaze porsentu 95 (95%) hodi suporta ekonomia Timor-Leste no haforsa nesesidade família uma laran nian, tantu iha sidade Dili no mós munisípiu sira seluk iha territóriu laran tomak.

Atualmente, total funsionáriu iha Telkomcel Timor-Leste hamutuk 230 resin, maibé hosi total ne’e ema na’in 218 ka porsentu 95 (95%) mai hosi Timor oan mak hala’o servisu iha operadór ne’e, no ema na’in 12 ka porsentu lima (5%) de’it mak mai hosi estranjeiru ka nasaun seluk.

Maibé, iha Timor oan hamutuk na’in 172 ka porsentu 75 (75%) mak okupa kargu jerente (managerial) no ema na’in 115 ka porsentu 50 (50%) mak hala’o funsaun hanesan traballadór bai-bain iha operadór Telkomcel. Tanba ne’e, taxa annual kresimentu ba funsionáriu sira ne’e kada tinan porsentu rua (2%).

Enkuantu, haree hosi rendimentu operadór Telkomcel nian, durante iha tinan 10 nia laran hatudu rendimentu ne’ebé mak di’ak (cukup baik), maibé hosi rendimentu di’ak ne’e balu utiliza fila fali hodi apoiu ba dezenvolvimentu nasaun ne’e nian liu hosi investimentu sira, prinsipalmente iha area teknolojia telekomunikasaun nian no mós edukasaun interna no esterna nian.

Tanba ne’e, atu haforsa no hadi’a di’ak liu tan operadór Telkomcel nian iha futuru, telekomunikasaun ne’e sei foku liu ba iha problema rede internet nian hodi bele hadi’a problema no difikuldade sira ne’ebé mak daudaun ne’e enfrenta nomeadamente mak liña internet no sira seluk, nune’e kliente sira bele utiliza di’ak liu tan produtu Telkomcel nian. “Hamutuk Ho Telkomcel Ita Bele Hetan Solusaun”.

 2,007 total views,  6 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Durante Tinan 10, Telkomcel Iha Ona Povu Timor-…” A few seconds ago
  • Share
ADVERTISEMENT
SCROLL FILA BA NOTISIA


Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error: