DILI (timorpost.com) — Nonu Governu Konstitusional ne’ebe mak lidera hosi Primeiru Ministru Kay Rala Xanana Gusmão, presiza kontrola folin sasan iha merkadu sira, nune’e negosiante sira labele hasae sasan ninia folin tuir ida-idak nia hakarak.
Ekonomista hosi Universidade Dili (UNDIL), Filipe da Silva, hatete nia parte ezije ba Ministériu Komérsiu Indústria (MKI) ho ekipa nune’e bele kontrolu sasán folin iha merkadu, liuliu foos, dehan folin tun, maibé loja sira seidauk hatún foos nia folin.
Tuir dosente ekonomia ne’e konta katak, sasán folin sa’e iha merkadu liuliu foos folin sa’e no nesesidade báziku sira seluk ne’e folin sai iha merkadu difikulta povu ki’ik sira ne’ebé laiha servisu no susar atu hetan osan kada loron.
“Tanba ne’e mak ita husu ba governu liuhosi MKI atu oriente nia ekipa tun iha terrenu hodi kontrolu loja sira iha Dili laran no iha munisípiu atu nune’e empreza sira labele manipula foos folin no nesesidade báziku seluk”, Filipe da Silva, dehan ba Timor Post iha kampus UNDIL Maskarinhas, Tersa (14/11).
Ekonomista ne’e relata, governu iha kompeténsia hodi kontrolu iha merkadu labele husik de’it hanesan ne’e, entaun fó oportunidade ba empreza sira manipula sasán tuir sira nia hakarak ikus mai povu ki’ik mak sai vítima.
Tanba ne’e mak governu liuhosi MKI iha obrigasaun atu kontrola iha baze liuliu foos ne’ebé empreza sira fa’an tenke ho folin 12 USD, atu nune’e, povu ki’ik sira ne’ebé laiha servisu bele sosa hodi konsumu ba nesesidade loron-loron nian.
Se foos tali merah, globus no foos furak nia folin iha munisípiu folin sa’e to’o 18.50 USD oinsá mak povu ki’ik sira ne’ebé laiha servisu, sira lori sai mak atu sosa hodi konsumu ba nesesidade loron-loron nian.
1,483 total views, 3 views today
Bele hare Video Seluk :
Subscribe to Timorpost
