DILI (TIMORPOST.COM—Membru Parlamentu Nasionál, lamenta ho ema deskoñesidu ne’ebé sunu xefe suku eleitu Bahalarawain nia uma iha postu administrative Vikeke Vila.
“Nu’udar reprezentante povu iha uma fukun ida ne’e hosi ami nia parte nafatin ezije responsabilidade ba komandu PNTL liuliu komandu PNTL munisípiu Vikeke atu orienta membru sira buka tuir suspeitu sira ne’ebé mak sunu uma xefe suku eleitu nian ne’e”, Prezidente Komisaun B, Trata Asuntu Negósiu Estranjeiru, Defeza no Seguransa, Deputadu Domingus Augusto ‘Deker’, dehan iha Parlamentu Nasionál, Tersa (14/11/2023).
Nia hatutan, maski seidauk hatene motivu hosi kazu refere, maibé komandu Polísia, munisípiu Vikeke buka tuir autór sira ne’ebé sunu xefe suku eleitu nia uma.
“Ida ne’e aktu krime, tanba ne’e autoridade seguransa tenke buka tuir autór sira nune’e bele husu ninia responsabilidade”, nia sujere.
Deputadu ne’e mós seidauk hatene loloos motivu husi aktu krime ne’e, karik iha orientasaun polítika ruma ka oinsá, maibé hosi komisaun B seidauk simu informasaun kle’an liu ba asuntu refere.
Nune’e mós deputadu bankada CNRT, Anacleto Freitas, husu ba Ministériu Interior liuliu komandu Munisípiu Vikeke atu buka tuir autór sira ne’ebé sunu xefe suku eleitu nia uma.
“Ha’u hakarak atu informa hela de’it ba vise-ministru atu enkamiña iha hela ba Ministru Interior, hodi kalan eleisaun xefe suku liu, ita-nia xefe suku eleitu ida nia uma sunu mutuk, tanba ne’e husu autoridade seguransa buka tuir autór ne’e tenke kaer”, Deputadu bankada CNRT lamenta.
3,005 total views, 6 views today
Bele hare Video Seluk :
Subscribe to Timorpost
