DILI (timorpost.com) – Daudaun ne’e kompañia Elip hamutuk ho komunidade halo konstrusaun foun ba sede suku Lahane Oriental, postu administrativu Nain Feto, munisípiu Dili.
Xefe suku Lahane Oriental, Trindade do Amaral Pinto Batista, hatete, programa konstrusaun ba sede suku foun Lahane Oriental ne’e programa husi Ministériu Administrasaun Estatál (MAE) liuhusi Programa Dezenvolvimentu Suku (PNDS) tinan ida ne’e halo konstrusaun foun ba sede suku ida ne’e.
“Tinan ne’e ami hetan oportunidade husi PNDS hodi halo konstrusaun foun ba sede suku foun ida ne’e iha sala rua xefe suku ida, sekretaria sala ida, xefe aldeia sira sala ida ho medida luan 4+5/8 metru nia naruk 16 metru”, Trindade Batista hateten ba Timor Post iha nia knaar fatin sede suku Lahane Taibesi, Kuarta (14/06).
Xefe suku ne’e esplika, tuir kontratu suku ho kompañia ho komunidade ne’ebé halo konstrusaun ba sede suku ne’e nia durasaun fulan tolu hodi entrega ba PNDS no MAE hodi halo inaugurasaun maka foin entrega ba xefe suku xefe aldeia hodi halo servisu.
Baptista hatete, tuir orientasaun no matan dalan husi MAE liuhusi PNDS ne’e suku hotu-hotu iha Timor-Leste halo reabilitasaun ba sede suku hotu maibé, grasa maromak nian husi proposta suku Lahane Oriental ba iha MAE hodi halo konstrusaun sede suku foun ne’e ministru MAE, Miguel de Carvalho, mak aprova proposta ne’e.
Nia dehan, ohin loron suku Lahane Oriental halo konstrusaun foun iha suku refere hodi fasilita xefe suku xefe aldeia, delegadu delegada sira hodi halo servisu atu atende ba komunidade sira trata sira nia dokumentu importante ruma sira bele tuur iha fatin dignu maka foin trata sira nia dokumentu.
Tuir xefe suku ne’e, sede daudaun ne’e kondisaun ladún favoravel iha sede suku laran simente kuak moru mós nakfera hotu iha tempu udan bee bele tama iha suku laran tanba ne’e maka sira halo proposta ba iha MAE konsege aprova duni proposta refere maka ohin loron hodi halo konstrusaun foun ba sede suku ne’e rasik.
Ikus liu, xefe suku ne’e agradese, ba oitavu governu ne’ebé aprova sira nia proposta hodi aloka orsamentu ho montante 24,000.00 USD hodi halo konstrusaun ba sede suku foun ida ne’e hodi fasilita xefe suku xefe aldeia uza hodi atende trata dokumentu ba komunidade sira iha suku refere.
2,731 total views, 3 views today
Bele hare Video Seluk :
Subscribe to Timorpost
