DILI (Timorpost.com)—Governu liu hosi Vise Primeiru Ministru no Ministru Koordenadór Asuntu Ekonomia Ministru Turizmu no Ambiente Francisco Kalbuadi Lay, hahú konvoka reuniaun inter-ministerial ba prosesu adezaun Timor-Leste ba Organizasaun Mundiál Komérsiu (OMK).
Francisco Kalbuadi Lay, hatete objetivu husi reuniaun inter-Ministerial ne’e atu buka kompleta saida de’it hodi ikus prienxe serbisu ba organizasaun Mundiál Komérsiu.
“Lokraik ida ne’e depois ita-nia membru plenu hanesan WTO ba ratifika tiha iha Parlamentu Nasionál, ohin Ministru na’in hira ne’ebé maka serbisu hamutuk OMK nia laran ami konvoka reuniaun ida atu haree servisu saida de’it mak sé ikus atu prenxe servisu hamutuk liuliu ba iha OMK nian,”. Dehan Francisco Kalbuadi Lay, ba Jornalista sira iha Edifísiu Faról, Kinta (06/06).
Iha fatin hanesan, Ministru Komérsiu Indústria (MCI-sigla Portugés), Nino Pereira, hateten daudaun ne’e Timor-Leste iha prosesu post adezaun ba organizasaun Mundiál Komérsiu (OMK).
“Liuhusi nivel enkontru koordenasaun ida ne’e atu haree fila-fali saida maka kada Ministériu iha Timor-Leste ninia preparasaun no haree fila lei ka dekretu leis sira ne’ebé maka presiza hodi kompleta rekizitu balun ba Post adezaun hamutuk 31 ba planu asaun lejizlasaun ninian”. Ministru Nino Pereira Informa.
Nia esklarese, iha Ministériu Komérsiu Indústria, iha lei tolu maka importante, ida maka lei ba kódigu programa industrial, ida maka kona-ba regra orijen ida fali lei kona-ba implementasaun planu asaun ninian.
Nia esplika, prosesu post adezaun ne’e, Timor-Leste sé serbisu, hodi haree lei balu presiza iha koordenasaun ho liña Ministerial sira seluk, no fahe servisu ba liña Ministerial sira ne’ebé mak atu kompleta Timor-Leste ninia planu asaun lejizlasaun nian.
Kona-ba data Timor-Leste sai membru plenu katak prosesu ne’e hahú 22 Fevereiru tinan 2024 nia laran to’o fulan Jullu 2024.
“Nune’e mós sei iha tan faze ida ne’ebé ke ita bele dehan faze krítiku importante tebes atu haree ita nia kompromisu ba iha adezaun ninian ne’e to’o fali iha tinan 2027,” Hateten nia.
Atu rekorda fali katak, antes ne’e Parlamentu Nasionál liu husi reuniaun plenária ordinária iha loron 3 fulan Juñu tinan 2024, halo ona aprovasaun ba Proposta Rezolusaun lei númeru 3/VI (1ª) kona-ba ratifikasaun ba Protokolu Adezaun, Repúblika Demokrátika Timor-Leste (RDTL) ba Organizasaun Mundiál Komersiu (OMK) ho votus 33 a favor, 3 kontra no 18 abstensaun.
Entretantu, reuniaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Primeiru Ministru, Francisco Kalbuadi Lay, Governadór Banku Sentrál Timor-Leste, Helder Lopes no Vise-Minstru ba Asuntu Parlamentár, Aderito Hugo da Costa.
1,800 total views, 3 views today
Bele hare Video Seluk :
Subscribe to Timorpost
