DILI, (timorpost.com)— Governu liuhosi Ministériu Komérsiu no Indústria (MKI), servisu hamutuk ho Kámara Komérsiu Indústria Timor-Leste (KKITL), lansa distribuisaun foos tonelada 38 ne’ebé sei fa’an ba povu iha munisípiu Vikeke no Kovalima, hodi halo intervensaun ba folin foos ne’ebé daudauk ne’e sei sa’e iha munisípiu rua ne’e.
Foos ne’e sei fa’an iha postu administrativu Ossu, munisípiu Vikeke no postu administrativu Fatumea, munisípiu Kovalima.
“Ohin ita distribui hamutuk 38 tolenada, 12 tolenada ba iha Vikeke-Ossu, 26 tolenada ba iha Kovalima postu Fatumea, ita nafatin iha esperansa katak Governu halo esforsu para atu nune’e ita-nia kompradór ka konsumedór sira, liuliu iha área rurál hanesan Fatumea ami simu informasaun katak foos ne’ebá nia presu $27,USD ba kilograma 20 ne’e, tanba ne’e maka ita presiza halo intervensaun”, Ministru Komérsiu Indústria (MKI), Filipius Nino Pereira, klarifika kedas ba jornalista, iha edifísiu MKI, Bebora, kuarta,13/12, hafoin halo lansamentu ba foos tonelada 38 ne’ebé sei distribui ba Vikeke no Kovalima.
Governante ne’e hatete, lansamentu distribuisaun foos marka Beruang Merah ne’ebé fornese husi kompañia distributór Kreative Furak, ne’ebé sei entrega ba kompañia lokál sira lori ba fa’an ba komunidade sira iha área rurál, liuliu iha munisípiu rua ne’e.
“Sira (kompañia lokál sira) sosa husi Kreative Furak, foos ida kilograma 20 ne’e ho folin $9,00 USD, depois sira sei ba fa’an fali ho folin $10,50 USD, ne’ebé nia másimu ita bele tolera to’o $11,00 USD iha Fatumea-Kovalima ho Ossu-Vikeke”,Nino Pereira, hatete.
Enkuantu ba munisípiu sira seluk, ministeriu sei haree para oinsá atu halo koordenasaun entre MKIA ho Karama Komérsiu Indústria no importadór sira para atu fornese mós ba munisípiu sira ne’ebé presiza iha tempu oin mai.
Aleinde ne’e Governu liuhosi MKI tenta hela ho kompañia importadór sira atu bele hatama mós foos susbídiu marka sira seluk atu bele fa’an ba povu kbi’it la’ek sira iha kapasidade finanséiru atu sosa.
Transporta foos susbísiu Governu ne’e, maske empreza lokál sira mak ba fa’an direitamente ba komunidade sira iha área rural, maibé karreta ne’e Governu mak fasilita hodi tula foos ba to’o iha fatin rurál.
Iha lansamentu ne’e partisipa mós husi Vise Ministru Komérsiu no Industria, KKITL, empreza Kreative Furak, no empreza loál sira.(*)
2,412 total views, 6 views today
Bele hare Video Seluk :