DILI (timorpost.com) – Negosiante husi merkadu Taibesi kontinua okupa fatin estasionamentu no troator leten hodi fa’an sira nia produtu lokál hanesan modo tahan, ai-fuan fresku no mós fa’an roupa obralan.
“Ami preokupa negosiante sira fa’an sasán iha fatin estasionamentu karreta no motor nia para fatin laiha, entaun ami mai merkadu atu para motor ho karreta iha fatin estasionamentu, maibé negosiante sira okupa hotu fatin estasionamentu hodi fa’an sira produtu,” João Madeira Soares hanesan komprador hateten ba Timor Post iha merkadu Taibesi, Domingu (04/06).
Nia dehan, ho problema ne’e obrigda motorista sira tenke para motor ho karreta iha estrada ninin hafoin mak la’o ain tama ba merkadu laran hodi sosa sasán ne’ebé presiza ba nesesidade nian.
Komprador ne’e afirma liutan katak, tuir loloos fatin estasionamentu ne’ebé governu kria iha merkadu ne’e hodi kontribui ba reseita atu hatama ba kofre estadu.
Maibé negosiante sira okupa hotu hodi fa’an produtu lokál no fa’an roupa maski governu kria fatin iha merkadu laran, maibé negosiante nafatin okupa fatin estasionamentu no troator leten karreta ho motor nia fatin fan produtu.
“Tanba ne’e mak ami husu ba servisu kontrolu jestaun merkadu munisipiu Dili no jestaun merkadu Taibesi atu kontrolu masimu iha merkadu Taibesi atu nune’e negosiante labele okupa fali fatin estasionamentu no troator leten karreta ho motor nia para fatin tanba fatin estasionamentu ne’e karreta ho motor nia para fatin ne’e selu taxa hodi kontribui ba kofre estadu hodi kontribui ba dezenvolvimentu iha rai laran”, nia dehan.
Iha fatin hanesan, Maria Soares Fátima, hatete, sira aproveita fa’an sasán iha fatin estasionamentu karreta ho motor nia para fatin ne’e iha loron Sábadu ho Domingu funsionáriu jestaun merkadu sira férias sira aproveita fa’an sasán iha estasionamentu hodi hetan osan atu bele sustenta ba nesesidade família nian.
“Ami fa’an sasan iha fatin estasionamentu ne’e loron Sábadu ho Domingu tanba funsionariu sira férias entaun sira lá kontrola iha merkadu ami aproveita fan sasan iha fatin estasionamentu hodi hetan osan atu bele responde ba nesesidade família nian,” nia dehan.
Relasiona ho preokupasaun hirak ne’e jornalista Timor Post tenta konfirma ho xefe departamentu servisu kontrolu jestaun merkadu munisipiu Dili Gaspar da Silva maibé la konsege tanba iha loron férias.
3,471 total views, 3 views today
Bele hare Video Seluk :
Subscribe to Timorpost
