DILI (timorpost.com) – Ahi-han Mutuk uma negósiu hamutuk 22, iha merkadu Taibesi, Aldeia Temporal, Suku Lahane Oriental, Postu Administrativu Nain-Feto, Munisípiu Díli.
Vítima ba Inséndiu, Nunes Gudinho Xemenes, informa akontesimentu Inséndiu ne’e iha oras tuku 12:45 meudia.
“Akontesementu Inséndiu ne’e, mai husi ami-nia viziñu, nia tuu hela bee iha buli cok, depois nia la kontrola, entaun bee ne’e maran, mak akontese inséndiu hodi rezulta ahi-han mutuk uma”, nia hateten iha fatin akontesimentu, Tersa (10/01).
Nia dehan, hafoin mosu inséndiu vítima sira konsege salva uluk sira-nia oan sira, tanba ne’e la akontese mate ruma, maibe ba sasán sira hanesan Ropa, dokumentu balun, Laptop no seluk tan, vítima sira la konsege salva no kona-ba osan nia parte la hatene.
“Fatin ne’ebé ahi han ne’e, sira hela ba buka moris hanesan fan obralan,” nia hateten.
Tanba ne’e nia husu ba Governu atu apoiu netik sira-nia sasán ne’ebé ohin ahi han tiha, tanba inséndiu ne’e sira la espera.
Iha fatin hanesan, Segundu Komandante Bombeiru Dili, Nurdin da Silva Mendonça, hatete sira-nia parte simu informasaun katak Inséndiu akontese iha merkadu Taibesi iha oras tuku 01:45 lokraik.
“Ami to’o iha ne’e ahi komesa boot ona, ami ho ekipa tun no ami konsege kombate duni iha parte balun, atu evita la bele daet fali ba parte seluk,” dehan Komandante Nurdin.
Nia dehan, sira-nia parte simu informasaun katak ahi han, maibe sira nia parte to’o iha fatin identifika katak, ne’e derrepente husi sirkuitu eletrisidade mak afeta sai boot hanesan ne’e.
“Ami la identifika kontador, tanba ahi han boot loos ona, maibé iha ne’e fiu tutan malu de’it uma-kain ida ba uma-kain ida, tanba ne’e kuandu ahi han ida, tenke daet kona hotu hanesan akontese agora,” nia hakotu.
Nune’e mós, Prezidente Autoridade Munisípiu Dili (AMD), Guilhermina Filomena Saldanha Ribeiro, hatete sira sei fó atedimentu ba vítima sira Inséndiu, hanesan mós vendedór sira ne’ebé akontese inséndiu iha fulan Dezembru tinan 2022.
“Ami seidauk hetan vendedór hira mak sai vítima, ne’ebé sei hein prosesu, ohin ita haree Bombeiru sira mak hamate ahi, entaun iha ekipa mak sei ba haree, enkuantu ahi mate ekipa levantamentu dadus Autoridade Munisípiu Dili nian, sei tun ba hamutuk ho vítima sira ho jestor merkadu, atu haree vítima hira, nune’e mós vendedór sira fan sasán saida-saida durante ne’e,” nia hateten.
Nia dehan, sira fó atendimentu ba vítima sira, mak hanesan fó konsulta ba labarik sira, tékniku sira sei halo levantamentu para haree fila fali, oinsá mak halo manutensaun ba fatin refere.
“Kona-ba hahan, ita tenke hatene lai, sira hela iha uma ka hela iha merkadu, tanba merkadu la’ós atu hela, mais sira hakarak ami fó hahan, ami sei fó hahan durante loron tolu, dadeer, meudia no kalan,” nia hakotu.
Enkuantu, ahi-han uma 22, populasaun feto 50, mane 49 no labarik 14, hamutuk 113, mak sai vítima ba akontesimentu ne’e.
2,435 total views, 3 views today
Bele hare Video Seluk :
Subscribe to Timorpost
