DILI– Iha tempu badak,Governu liuhosi Ministériu Edukasaun (ME) sei anúnsiu rezultadu falsifika diploma falsu ba iha públiku.
Inspetór jerál ME, Jaime da Cruz, hatete, ME halo investigasaun ba eskola sekundária privadu no públiku lima ne’ebé deskonfia estudante balun laiha diploma orijinál no estudante falsifika diploma falsu.
“Ami halo ona verifikasaun dadus hotu ona, aban entrega relatóriu ba Ministra Edukasaun, Dulce de Jesus mak fó sai nia rezultadu falsifika diploma falsu ne’e ba iha públiku atu hatene,”Jaimehateten ba Timor Post iha nia servisu fatin, Kinta (23/11).
Eis diretór eskola ensinu báziku públiku Rai Kala Ermera ne’e hatete, iha loron hirak nia laran sira nia ekipa halo ona investigasaun hotu ona, maibé sira hato’o ba iha ministra maka foti desizaun ba funsionáriu ne’ebé mak falsifika ba diploma falsu ne’e.
“Ami hato’o relatóriu ba ME mak foti desizaun, karik kazu ne’e grave liu sei haruka ba Komisaun Funsaun Públiku hodi foti medida rigorozu hodi aplika ba funsionáriu ne’ebé maka falsifika diploma falsu ne’e”, nia hateten.
Tuir nia, ema hotu iha lei nia okos se mak komete kazu korrupsaun, ka krime ruma, tenke iha responsabilidade ba aktu hirak ne’ebé nia halo hodi prosesa tuir lei ne’ebé iha. Atu nune’e iha tempu tuir ema labele falsifika diploma falsu tuir sira nia hakarak.
Antes ne’e, Edukasaun Munisípiu Dili (EMD) konsege identifika estudante sira iha eskola sekundária públika no privada lima mak ho diploma falsu.
Diretór Edukasaun Munisípiu Dili, Carlito da Silva, hatete, eskola lima ne’e mak hanesan Ensinu Sekundáriu Jeral 4 de Setembro Unamet, Fitun Naroman Timor Lorosa’e (Finantil), Nobel da Paz, 05 de Maio, no Eskola Cristal.
“Eskola sekundária públika tolu estudante sira iha diploma falsu hanesan eskola sekundária jerál 4 Setembru UNAMET Dili estudante ida, Finantil ualu. Iha eskola Nobel da Paz barak mak laiha diploma orijinál husi eskola ensinu báziku,” Carlito da Silva informa ba Timor Post iha nia knaar fatin, Komoro, Sesta (17/11)
Tuir nia, estudante sira ne’ebé laiha diploma orijinál ne’e hamutuk 137. Eskola sekundária jerál 4 de Setembru Unamet Balidi estudante hamutuk 13, Finantil Ai-mutin na’in-105, Eskola 05 de Maio Bekora na’in-haat, Cristal na’in-12, no Nobel da Paz hamutuk na’in-tolu.
Carlito da Silva hatete katak antes fulan tolu, EMD orienta diretór eskola ensinu báziku sentrál no ensinu sekundária jerál iha Dili laran atu fó avizu ba estudante sira hatama diploma orijinál hodi prepara ba ezame nasionál no ezame lokál.
“Estudante na’in-tolu mak mai informa iha Edukasaun Munisípiu katak sira nia diploma eskola nian falsu, enkuantu estudante sira seluk to’o agora seidauk mai aprezenta, signifika katak sira labele partisipa ezame segundu xamada,” afirma diretor.
Tuir nia, antes ne’e eskola fó ona oportunidade estudante durante fulan tolu hodi kompleta dokumentu diploma, maibé estudante hirak ne’e la mai aprezenta no la entrega diploma ba eskola ida idak.
Nune’e mós, Diretór eskola SG 4 Setembru UNAMET Balidi, Martinho Menezes, temi katak estudante ESJ 4 de Setembru UNAMET Balidi na’in 32 laiha diploma orijinál no la tuir ezame nasionál no ezame lokál.
“Ami nia estudante finalista hamutuk 32 laiha diploma orijinál entaun eskola la fó autorizasaun ba sira hodi tuir ezame nasionál. Ami hein sira mai aprezenta sira nia diploma orijinál mak eskola sei haruka sira nia naran ba Edukasaun munisípiu Dili”, hatete Martinho Menezes ba Timor Post, Sábadu (18/11).
Profesór ne’e informa katak eskola sei haruka ba Ministériu Edukasaun hodi fó autorizasaun ba estudante sira hodi tuir fali ezame xamada segundu nian iha loron tuir mai ka lae, konforme desizaun husi ministra nian.
“Estudante na’in-rua maka falsifika diploma, tanba sira nia diploma ne’e la’ós Ministériu Edukasaun maka asina, maibé sira na’in rasik maka asina fali sira nia diploma entaun eskola konsidera katak diploma falsu,” nia afirma.
Tuir diretór eskola ne’e, estudante hamutuk 34 maka la tuir ezame nasionál tanba estudante balu laiha diploma orijinál no estudante balu falsifika diploma.
“Eskola hein hela estudante sira, maibé iha loron hirak nia laran estudante na’in lima mai aprezenta ona sira nia diploma orijinál atu nune’e eskola haruka ba Ministériu Edukasaun hodi realiza ezame segundu xamada nian iha semana oin. Total estudante finalista ne’ebé tuir ezame nasionál no ezame lokál hamutuk 1.084.
1,128 total views, 3 views today
Bele hare Video Seluk :
Subscribe to Timorpost
