Dili (timorpost.com) – Universidade Nasionál Timor Lorosae (UNTL) liuhusi Sentru Nasionál Formasaun Sientífika sei fasilita formasaun iha ámbitu metodolojia peskiza kualitativu ba funsionáriu sira iha Komisaun Funsaun Públiku (KFP) iha tempu badak.
“Ohin Komisaun Funsaun Públika (KFP), hamutuk ho Reitór Universidade Nasionál Timor Lorosae (UNTL) no Institutu Nasionál ba Administrasaun Públiku (INAP) asina akortu dokumentu servisu hamutuk kona-ba formasaun iha ámbitu metodolojia peskiza Kualitativu nian, atu nune’e bele hasae liu tan koñesementu funsionáriu KFP kona-ba hakerek ho natureza kualitativu no narativu”, Prezidente Komisaun Funsaun Públiku (KFP), Faustino Cardoso Gomes, hateten iha salaun enkontru KFP Matadouru, Segunda (26/09).
Nia subliña, situasaun ida ne’ebé KFP observa iha lakuna barak no difisiensia iha funsaun públika nian, tanba ne’e KFP hola inisiativa hodi serbisu hamutuk ho UNTL liuhusi sentru formasaun sientífika, hamutuk ho INAP, tanba orsamentu ba ámbitu formasaun ne’e mai husi INAP ne’ebé sei responsabiliza, ba formasaun sientifiku iha natureza kualitativu no narativu.
“Nune’e KFP hola inisiativa hodi hamutuk ho Instituisaun UNTL no INAP hodi asina akortu dokumentu ida importante los ba ita-nia funsionáriu Komisaun Funsaun Públiku sira iha instituisaun ida ne’e”, Prezidente KFP dehan.
Entretantu Reitor Universidade Nasionál Timor Lorosae (UNTL) João Martins, hatutan objetivu asina dokumentu servisu hamutuk entre Komisaun Funsaun Públika, UNTL no INAP atu nune’e UNTL liuhusi sentru nasionál formasaun sientífika oinsá atu hasae koiñesememtu funsionáriu sira iha KFP, iha tempu badak.
2,267 total views, 12 views today
Bele hare Video Seluk :