DILI (timorpost.com) – Tanba deskonfia mosu manipulasaun ba valor ezame nasionál, Organizasaun Noun Governamentál (ONG), Timor-Leste Coalition For Education (TLCE) husu Ministériu Edukasaun, Juventude no Desportu (MEJD), atu hadi’a sistema edukasaun.
Diretór Ezekutivu TLCE, José Monteiro, hatete Governu atu aplika bolsa méritu ba eskola sira iha territóriu nasionál, tenke mai fó informasaun ba públiku detallu, molok aprezenta iha parlamentu nasionál hodi hetan osan ka apresiasaun. Tanba deputadu sira lahatene aspetu edukasaun atu la’o di’ak, entaun sira aprova osan arbiru de’it.
“Hanesan Ministériu edukasaun tuir plenáriu iha parlamentu nasionál, sira aprezenta planu katak, ami tinan oin hakarak fó prémiu ka rekoñese estudante sira ho mellor valor, atu motiva sira maibé tenke iha planu labele uza osan hodi sosa valor”, nia hatete ba Timor Post iha knaar fatin Kaikoli, Kuarta (11/1).
Nia dehan, se MEJD fó bolsa méritu ba estudante sira, tenke mai ho planu rigorozu ida, labele fó espasu ba manipulasaun valór ba estudante sira. MEJD tenke fiar valor ne’ebé eskola haruka labele manipula valor ikus mai família mak sai fali klasifikadu.
“Tuir loloos Deputadu sira iha Parlamentu nasionál tenke halo konfirmasaun ho Ministériu Edukasaun lai, karik aprova tiha osan mak ikus mosu manipulasaun ne’e oinsá, tuir duni kapasidade estudante sira nian ka lae, se ita fó valor ba estudante sira liu ne’e ha’u sente di’ak hela”, katak nia.
Nia hateten, TLCE fiar profesór sira tanba fó valor tuir duni kapasidade estudante nian, maibé iha ida ka rua mak halo hanesan manipulasaun, tanba ne’e MEJD presiza hadi’a sistema ida ne’e, se lae tinan oin mai akontese hanesan ne’e tan. MEJD tenke kria regra rigorozu ida, nune’e tulun eskola no profesór sira fó valor ne’ebé di’ak tuir kapasidade estudante ida-idak nian.
“Jeralmente ita rona balun manipulasaun, tanba ministériu edukasaun trata asuntu ne’e lalais, ha’u fiar katak tinan oin sei kontinua mosu hanesan ne’e, se ita la hadi’a entaun tinan oin ita repete sala edukasaun sei monu”, nia hateten.
Nia parte, husu MEJD tenke investiga no buka tuir manorin ida ne’ebé manipula valor tenke prosesu nia, labele matan osan de’it maibé onestu ne’e relativa, entaun presiza iha lei atu regula manorin ne’ebé kanten osan.
“Ita bele kanten, na’ok, kuandu regulamentu iha ita labele hakat, se MEJD la hadi’a agora ha’u fiar tinan oin sei mosu problema”, katak nia.
José haktuir, estudante ne’ebé sai klasifikadu iha tinan 2022 sira ezame baibain la sai melor (Juara) derrepente de’it sira valor boot liu fali estudante ida ne’ebé kada ezame hetan melor klasifikadu.
Atu garantia kualidade edukasaun labele haree de’it família, karik mantein atitude hanesan ne’e tinan oin mai tan sei mosu problema boot liu ho situasaun agora.
Nia konta, antes ne’e la akontese hanesan ne’e tanba osan seidauk iha, konserteza laiha vantajen ba estudante sira, estudante atu kontinua iha universidade mós la liu tanba valor la to’o, problema mosu ne’e bainhira MEJD hamosu bolsa méritu.
“Se apresiasaun ba buat hotu uza osan, ha’u hanoin ita uza osan hodi sosa matenek ne’e labele, atu sai matenek tenke esforsu aan mesak, moris ne’e hanesan kompozisaun ita-nia vida moris loron-loron ita sosa ho osan”, hateten nia.
Nia hatutan, ema matenek atu dezenvolve nasaun la’ós uza osan sosa matenek, MEJD labele haree edukasaun hanesan projetu ida lae edukasaun hakdasak laiha mudansa ba ema nia moris, tenke oriente estudante sira labele uza hahalok ida manipulasaun valor.
“Bainhira MEJD la aprósima ka prevene lalais prosesu falsifikasaun valor sei mosu problema depois difisil atu garantia kualidade edukasaun, espera tinan oin labele repete tan atitude hanesan ne’e”, nia hato’o.
Jose hateten, bolsa méritu hanesan subsídiu komplementár, subsídiu laiha mós edukasaun la’o, pior liu tan subsídiu iha ne’e profesór sira lalin família sai melor klasifika, tanba ne’e MEJD tenke atensaun sériu nune’e garantia kualidade edukasaun.
“Tanba ne’e tenke hadi’a polítika subsídiu própriu, tenke iha mekanizmu kontrolu adekuadu para depois labele hamosu diskriminasaun ka falsifikasaun valor nune’e edukasaun atinje objetivu”, nia hakotu.
3,030 total views, 6 views today
Bele hare Video Seluk :
Subscribe to Timorpost
