Dili (timorpost.com) — Estudante Finalista ida ho naran, Dircia dos Santos, hetan Mellor klasifikadu ho valor 3,78, iha Institutu of Business (IOB), tinan 2022.
Bainhira Timor Post Online, hakbesik ba entrevista, nia konfesa ohin termina ona estudu lisensiatura (S1) iha Fakuldade Ekonomia no Jestaun, sai hanesan Mellor klasifikadu iha Institutu Of Business (IOB), maibé sente triste inan-aman la marka prezensa tanba fila hikas ona ba Aman Maromak nia kadunan santu (matebian).
Dircia konta nia prosesu durante tinan haat nia laran ho matan been, maski Inan-Aman iha mundu seluk (matebian) ona, maibé sira la taka matan ba oan, husi oan ema barak koñese papa no mama nia naran.
“Ha’u agradese ba Aman Maromak, agradese mós ba ha’u-nia Papa ho Mama maski fila ona ba mundu seluk (matebian), maibé ha’u fiar katak valor ne’ebé ha’u hetan sira kontente”, tenik nia, hafoin Serimónia Graduasaun, iha Salaun IOB, Segunda (19/12).
Graduada isin-mutin, fuuk been, ain altura ne’e, sai Mellor klasifikasaun iha Fakuldade Ekonomia e Jestaun, iha tinan akadémika 2022.
Nia konta, durante tinan haat nia hasoru dezafiu oioin iha prosesu nia laran, maibé ho vontade esforsu nafatin, tuir atividade extra kurrikulár mata-dalan bele sai Mellor klasifikadu.
Nia haktuir, matenek ne’ebé nia iha sei kontribui ba Timor-Leste, hakarak kontinua nia estudu iha nivel Mestradu.
“Ha’u atu dehan de’it katak, husi valor ne’ebé ha’u hetan fiar katak sei kontribui ba Timor-Leste no mós hakarak foti tan estudu nivel Mestradu”, nia promete.
Tanba ne’e, nia dehan, valor ne’ebé hetan la’ós sai sasukat ida ba susesu, no mós la’ós dalan susesu ona, bainhira hetan ona karreira mak foin bele dehan susesu.
16,683 total views, 6 views today
