LAUTEM (Timor Post) – Eskola Ensinu Pre-eskolár iha Aldeia Somotcho, Suku Bauro, Postu Administrativu Lospalos, Munisípiu Lautem, estudante sira hala’o prosesu aprendizajen Tuur iha Rai.
Professora Voluntária, Idolina Alves Pereira, hatete labarik Sira hakarak eskola, maibé kondisaun mak hanesan ne’e.
“Estudante sira kuaze 57, iha aldeia Somotcho, hakarak mai aprende maibé Eskola falta fasilidade no laiha Funsionáriu ka profesor no Professora permanenete atu tau matan”, Nia hateten ba Timor Post, iha nia kna’ar fatin, Segunda (08/08).
Nia dehan, eskola pre-Eskolár, mak sai hanesan baze ka fundasaun ba estudante sira, antes hakat ba klasse 1 ka 2, to’o nível universidade.
“Pre-eskolár iha nível Zero Ki’ik (0), to’o Zero Bo’ot (0), estudante idadade 4 to’o 6, iha inisiativa no kreatividade atu mai eskola, nune’e ami lori kapasidade universitáriu mai hanorin sira ho espiritu voluntária, dezde 2010 ate 2022”, nia informa.
Alende ne’e, professora voluntária mós konfesa, halo kontribuisaun tempu naruk ona, maibé la hetan Osan. nune’e mós susar tebes atu hetan pozisaun ba permanente.
“Tanba ne’e husu ba Governu Liuliu Ministériu Edukasaun, Juventude no Desportu (MEJD), bele kria kondiasaun ruma ho dignu ba ami atu moderniza liu tan ami-nia kapasidade tuir kurríkulu edukasaun Profisional nian”, nia dehan.
Nia afirma, durante Sira hanorin labarik sira mós mai ho inisiativa rasik, ne’ebé ajuda hosi Organizasaun Noun-Governamental (ONG), esperanca, mak fó ajudu, kona-ba fasilidade sira, oinsá uza hodi hanorin.
Iha parte seluk Koordenadór EBF Ira-Lafai, Calisto dos Santos Alegria, hatete prosesu ida ne’e mak sai hanesan difikuldade boot tebes ba Estudante sira atu aprende, tanba laiha konesimentu di’ak atu hanorin tanba sira mai ho inisiativa rasik.
“Hau lameta teb-tebes, maski ami funsionáriu kontratadu, maibé sente triste bainhira ema ida mak hakarak lori nia inisiativa rasik hodi mai hanorin”, nia subliña.
Edukasaun ne’e sai hanesan luta ida ne’ebé ho prosesu naruk, maibé bele hadian ita-nia a’an iha tempu badak, nune’e hanesan Ministériu relevante tenki toma responsabiliza ba Pre-eskolár iha aldeia Somotcho Suku Bauro nian.
Maneira ida mak buka Funsionáriu ka profesor/a ne’ebé di’ak atu hanorin estudante tuir ritmu ne’ebé edukasaun nian.
Iha parte importante liu mak hosi Ministériu relevante bele mós loke konkursu ba profesora sira ne’ebé voluntária, bele tuir hodi hasae sira-nia kapasidade, atu Mellora estudante sira nia koñesimentu.
1,442 total views, 3 views today
